Presidentja Vjosa Osmani, pas takimit me liderët e partive politike në Kosovë, ka thënë se nuk ka parë një vullnet politik për zgjedhje të jashtëzakonshme, prandaj përgatitjet do të bëhen për zgjedhje të rregullta, raporton Ekonomia Online.
Osmani ka shtuar se ka mbetur të bëhet edhe një analizë e datave që janë folur në këtë takim dhe se do të dalë me një datë që do ta bëjë publike në vijim.
Sipas saj, në mbledhjen e mbajtur nuk pati ndonjë kundërshtim por vetëm preferenca të ndryshme mes datave 26 janar – 16 shkurt 2025, duke shtuar se për zgjedhjet e rregullta po bisedojnë për katër data: 26 janar, 2 shkurt, 9 shkurt ose 16 shkurt.
“Siç e dini të gjitha partitë kanë qenë të ftuara në nivel kryetarësh. Nënkryetari Glauk Konjufca ka shprehur gatishmëri të plotë të vijë në takim. Por pasi partitë kanë qenë vetëm në nivel kryetarësh, e kemi mbajtur parimin për të gjithë dhe Konjufca me mirëkuptim e ka zbatuar. Sot nuk ka qenë prezent kryetari i Lëvizjes Vetëvendosje. Nuk i dimë arsyet besoj mund ta pyesni drejtpërdrejt atë, po supozoj se është në zyrë. Kështu që mund të shkoni dhe ta pyesni”, ka thënë Osmani.
“Kishte edhe dy mungesa tjera, lista SRPSKA e cila nuk na ka njoftuar asgjë dhe partia e Elbert Krasniqit, përkundër se e ka konfirmuar pjesëmarrjen. Sa i përket zgjedhjeve të jashtëzakonshme, mundësia ligjërisht ende ekziston. Megjithatë, kjo kërkon 2/3 e votave në Kuvend dhe se disponimin e partive politike. Në rast të shpërndarjes se kuvendit, afati është shumë i shkurtë. Për momentin, përgatitjet i bëjmë për zgjedhje të rregullta. Mesa pashë unë, nuk pati disponim që të shkojmë në zgjedhje të jashtëzakonshme. Datat i dimë të gjithë, nga 26 janar deri më 16 shkurt. Planifikimi është shumë i rëndësishëm, prandaj do të tentoj që si presidente ta bëj publike sa më shpejt datën e zgjedhjeve”, ka vazhduar tutje presidentja.
Në takim morën pjesë kryetari i Lidhjes Demokratike të Kosovës, Lumir Abdixhiku, Partia Demokratike e Kosovës, Memli Krasniqi dhe kryetari i Aleancës për Ardhmërinë e Kosovës, Ramush Haradinaj. Mimoza Kusari-Lila përfaqëson partinë Alternativa, ndërsa Faton Peci kryeson “listën GUXO”.
