Shkup, 11 mars – Në panel-diskutimin e sotëm në Kuvend, të iniciuar nga Fondacioni “Romët për Demokraci”, u shkëmbyen përvoja dhe mendime për ecurinë e grave rome jo vetëm në komunitetin shoqëror, por edhe në institucionet publike dhe në politikë.
Të pranishmit theksuan se me iniciativën e titulluar “Mirë për gratë rome, mirë për Kuvendin e Republikës së Maqedonisë së Veriut”, ndër të tjera ofrohet edhe zëri për barazi, gjithëpërfshirje dhe forcimin e vullnetit politik për kapacitetin e grave rome dhe kontributin e tyre në progresin e vendit.
Zëvendëssekretari i përgjithshëm Bojan Vasilevski, në fjalën e tij, theksoi se komuniteti rom është pjesë përbërëse e shoqërisë sonë dhe se kontribuon në trashëgiminë kulturore, shprehjen artistike dhe identitetin kolektiv. Por edhe se, pavarësisht gjithë këtij kontributi, megjithatë, gratë rome vazhdojnë të përballen me barrierat sistematike. Dhe për këtë theksoi se përkushtimi i Dhomës Ligjvënëse është të dëgjojë zërin e të gjithë atyre që jetojnë në shtet.
“Ne të gjithë po përparojmë së bashku dhe po ecim përpara drejt një të ardhmeje më të ndritshme. Fuqizimi i grave rome nuk është vetëm çështje e drejtësisë sociale, është mbi të gjitha imperativ strategjik për avancimin e demokracisë sonë dhe realizimin e aspiratave tona të përbashkëta për një të ardhme më të mirë”, tha Vasilevski.
Selvije Mustafi Alkan nga Fondacioni “Romët për Demokraci” theksoi se qëllimi i iniciativës së sotme është t’i kujtojë institucionet shtetërore për kapacitetin e këtyre grave.
“Iniciativa “Mirë për gratë rome, mirë për Kuvendin e Republikës së Maqedonisë së Veriut” është edhe për gratë rome, edhe për Kuvendin, pasi paraqet një hap përpara drejt promovimit të barazisë dhe përfaqësimit në institucionet. Besoj se me mundësinë e tillë në Dhomën Ligjvënëse do të ndodhë një kthesë e rëndësishme, sepse është një hap strategjik në përparimin e Maqedonisë së Veriut në rrugën drejt Bashkimit Evropian”, tha Mustafi Alkan.
Këshilltarja për çështjet rome e presidentit të shtetit, Fikrija Tair, bëri një retrospektivë të përvojave, sfidave dhe mundësive të grave rome në institucionet publike. Ajo theksoi se gruaja rome vuan nga diskriminimi i shumëfishtë, barrierat gjinore dhe se përballet me përjashtim si në rrjedhat e përditshme të zhvillimit shoqëror, ashtu edhe nga komuniteti të cilit i përket.
“Është me rëndësi thelbësore të reflektohen mundësitë për pjesëmarrjen tonë në debatet vendimtare, si dhe gatishmëria dhe transparenca e institucioneve për çështjet gjinore, për avancimin e pozitës së grave rome dhe pjesëmarrjen e tyre në proceset politike”, tha Tair.
Në panel-diskutimin foli edhe Irene Ketof nga Ambasada Franceze, e cila e përshëndeti dhe e mbështeti iniciativën “Mirë për gratë rome, mirë për Kuvendin e Republikës së Maqedonisë së Veriut”. Fjalime të tyre patën edhe Arabella Iljaz, Mersiha Sali Usain dhe Mensur Haliti.
