Ministrja e Shëndetësisë dhe Mbrojtjes Sociale, Albana Koçiu po zhvillon nje vizitë zyrtare në Izrael nga ku u shpreh sot se partneriteti mes Qendrës Spitalore Universitare “Nënë Tereza” dhe Sheba Medical Center forcon bashkëpunimin për një sistem shëndetësor më të avancuar.
Sipas Koçiut, “ky partneritet me fokus në riorganizimin e shërbimit onkologjik, menaxhimin spitalor dhe rritjen e kapaciteteve përmes trajnimeve të vazhdueshme për mjekët dhe infermierët, është një garanci e shtuar për trajtim më cilësor të pacientëve tanë”.
“Shoqëruar nga 15 mjekë të QSUNT vizituam Sheba Medical Center në Tel Aviv një ndër 10 qendrat spitalore më të avancuara në botë. Së bashku me drejtuesit e Sheba Medical Center, me të cilët nënshkruam një partneritet strategjik në nëntor të vitit që shkoi biseduam për ecurinë e objektivave tanë të përbashkët. Folëm për ristrukturimin e shërbimit onkologjik, për krijimin e ekipeve multidisiplinare që përcaktojnë trajtime të personalizuara dhe efikase për këdo si edhe për modernizimin e aparaturave apo protokolleve të kurimit”, pohoi Koçiu në postimin në rrjetet sociale.
Ministrja e Shëndetësisë dhe Mbrojtjes Sociale, shtoi se fokusi tjetër i bisedimeve ishte menaxhimi efikas i pacientëve, me fokus në reduktimin e radhëve të pritjes.
“Hodhëm hapa konkretë për fuqizimin e kapaciteteve tona njerëzore dhe profesionale përmes shkëmbimit të eksperiencave periodike. Në Shqipëri kemi nisur të shohim rezultatet e këtij partneriteti shumë të rëndësishëm për ne, por jam e sigurt në muajt në vazhdim ky partneritet do ndihmojë në hapjen e një kapitulli të ri standardesh shumë më të larta, për të gjithë qytetarët shqiptarë”, tha Koçiu.
