Tiranë, 12 gusht, Zhurnal.mk – Qendra Spitalore Universitare “Nënë Tereza” përcolli sot historinë e një paciente të trajtuar pas një infarkti të rëndë.
Në një dëshmi të publikuar nga QSUNT në rrjetet sociale, pacientja tregon përvojën e saj gjatë trajtimit, nga shërbimi i urgjencës dhe reanimacioni, deri në pavijonin e Kardiokirurgjisë, duke vlerësuar profesionalizmin, përkushtimin dhe kujdesin e stafit shëndetësor.
“Jam shtruar me zemër. Kam qenë në një gjendje shumë të keqe, me infarkt. Më ra në shtëpi dhe kam ardhur me urgjencë në spital”, shprehet pacientja, e cila thekson se është ndier e sigurt dhe e mirëtrajtuar gjatë gjithë periudhës së hospitalizimit.
Ajo shpreh mirënjohje të veçantë për mjekët, infermierët, sanitaret dhe të gjithë personelin që u kujdesën për të, ndërsa falënderon posaçërisht shefin e Kardiokirurgjisë, Alban Dibrën.
“Jetën e kam nga Albani dhe e përshëndes shumë”, shprehet ajo, duke vlerësuar punën e mjekëve dhe përkushtimin e tyre ndaj pacientëve.
Pacientja veçon gjithashtu kujdesin 24 orë në 24, përkushtimin e kryeinfermieres dhe stafit infermieror, si dhe pastërtinë dhe rregullin në ambientet spitalore.
“Tani jam gati që të dal në shtëpi e shëndoshë e mirë”, shprehet ajo, duke e cilësuar përvojën e saj në spital si një dëshmi të rëndësisë së kujdesit njerëzor dhe profesional ndaj pacientit.
QSUNT nënvizon se pas çdo “faleminderit” të një pacienti qëndron një histori njerëzore, një moment vështirësie dhe një ekip profesionistësh që kanë qenë aty për të ofruar kujdes dhe mbështetje.
“Me përkushtim. Me profesionalizëm. Me zemër”, thuhet në mesazhin e QSUNT.
