Këshilli Gjyqësor i Kosovës ka mirëpritur opinionet e Komisionit të Venecias për tri ligje ndërlidhur me reformën në drejtësi.
Tri ligjet janë për rekrutimin dhe vlerësimin e gjyqtarëve e prokurorëve, procedurat disiplinore ndaj tyre dhe Akademia e Drejtësisë.
Këshilli Gjyqësor ka vlerësuar se rekomandim i Venecias është edhe eleminimi i çdo ndikimi të mundshëm nga pushteti.
Njoftimi:
Këshilli Gjyqësor i Kosovës (KGJK), mirëpret tri opinionet e Komisionit të Venecias për projektligjet që kanë të bëjnë me KGJK-në, me rekrutimin dhe vlerësimin e gjyqtarëve dhe prokurorëve, me procedurën disiplinore për gjyqtarë dhe prokurorë dhe Akademinë e Drejtësisë.
Këto opinione janë miratuar në Sesionin e 142-të Plenar të Komisionit të Venecias më 14-15 mars 2025.
KGJK vlerëson lartë analizën e detajuar të pakos legjislative sipas së cilës analizë projektligjet janë përgjithësisht në harmoni me standardet evropiane.
Rekomandimet e ofruara nga Komisioni i Venecias janë të mirëseardhura dhe do të ndihmojnë në forcimin e pavarësisë, efikasitetit dhe integritetit të sistemit gjyqësor në Kosovë.
Projektligjet e vlerësuara nga Komisioni i Venecias janë rezultat i zotimin të përbashkët për reformën në drejtësi, të nënshkruar më 14 mars 2023 nga Ministria e Drejtësisë, KGJK, Këshilli Prokurorial i Kosovës (KPK), Gjykata Supreme dhe Prokurori i Shtetit.
KGJK shpreh përkushtimin për të kontribuar në finalizimin e projektligjeve sipas rekomandimeve nga Komisioni i Venecias në bashkëpunim të ngushtë me Ministrinë e Drejtësisë, KPK-në, Gjykatën Supreme, Prokurorin e Shtetit dhe institucionet tjera vendore dhe ndërkombëtare.
Këshilli Gjyqësor merr në konsideratë të gjitha rekomandimet e dhëna nga Komisioni i Venecias, përfshirë:
- Rëndësinë e sigurimit të pavarësisë institucionale të KGJK-së dhe shmangien e çdo ndikimi të panevojshëm nga ekzekutivi apo organet e tjera të pushtetit;
- Përmirësimin e procedurave të rekrutimit, emërimit dhe vlerësimit të performancës së gjyqtarëve dhe prokurorëve, duke siguruar standarde të qarta dhe të parashikueshme;
- Sigurimin e një sistemi më të qëndrueshëm dhe të drejtë të kontrollit të integritetit dhe disiplinës, bazuar në parime të qarta dhe në përputhje me Kushtetutën e Republikës së Kosovës dhe me standardet evropiane, dhe
- Garantimin e trajnimeve cilësore për gjyqtarët.
Në këtë kontekst, KGJK falënderon të gjithë gjyqtarët, ekspertët, institucionet vendore dhe ndërkombëtare dhe organizatat e shoqërisë civile që kanë kontribuar në hartimin e kësaj pakoje ligjore. Kontributi i tyre ka qenë i një rëndësie të veçantë për sigurimin e një reforme gjithëpërfshirëse dhe të bazuar në standarde të larta profesionale.
Po ashtu, KGJK falënderon Këshillin e Evropës dhe Komisionin e Venecias për ekspertizën e çmuar dhe ndihmën e ofruar në reformimin e sistemit të drejtësisë në Kosovë.
KGJK bën thirrje për adresimin sa më të shpejtë dhe efektiv të rekomandimeve të Komisionit të Venecias dhe të Raportit të Vendit të Komisionit Evropian lidhur me reformën në drejtësi, duke e konsideruar këtë proces me prioritet të lartë dhe një element kyç në rrugën e Kosovës drejt integrimit evropian. Progresi në zbatimin e kësaj reforme është thelbësor për ndërtimin e një sistemi gjyqësor të besueshëm, transparent dhe efikas, që i shërben qytetarëve dhe rrit besimin e publikut në drejtësi.
