Grupi parlamentar i Partisë Demokratike ka depozituar sot kërkesën pranë Kuvendit për ngritjen e komisionit hetimor për kontrollin e ligjshmërisë në procedurat e miratimit të projektit “Marina & Jahtet e Durrësit”; shitjes së koncesionit të menaxhimit të portit kompanisë “Schapha d.o.o.”; dhe ndërtimit të portit të ri në Porto Romano.
Komisioni i kërkuar nga PD ka për objekt të veprimtarisë së tij shqyrtimin e të gjitha problematikave lidhur me miratimin e projektit “Marina e Durrësit & Jahtet”, prishjen e kontratës me kompaninë gjermane EMS dhe shitjen e koncesionit te kompania kroate “Schapha d.o.o.”, si dhe projektimin e ndërtimin e portit të ri tregtar në Porto Romano.
Po ashtu, PD thekson se komisioni do të bëjë vlerësimin e nevojës për marrjen e masave, përfshirë ndërhyrjet ligjore nëpërmjet miratimit, korrigjimit apo plotësimit të legjislacionit relevant për garantimin e parimeve të ligjshmërisë, barazisë, konkurrencës, meritokracisë, eficencës ekonomike, mbrojtjes së pronës publike dhe ruajtjes së buxhetit të shtetit në të gjitha kontratat publike që angazhohet qeveria shqiptare.
PD kërkon që komisioni të përbëhet nga 11 anëtarë, nga të cilët kryetari dhe katër anëtarë i përkasin grupit parlamentar të Partisë Demokratike dhe gjashtë anëtarë grupit parlamentar të Partisë Socialiste.
Në kërkesën e PD-së thuhet se komisioni e ushtron veprimtarinë për një afat 6-mujor nga data e miratimit të vendimit.
Po ashtu, PD sqaron se puna e komisionit hetimor nuk do të konsistojë në nxjerrjen e përgjegjësive penale për personat që potencialisht mund të kenë kryer shkelje, pasi kjo është detyrë funksionale e organeve të drejtësisë.
“Komisioni hetimor do të përqendrojë punën e tij në njohjen dhe verifikimin në thellësi të ligjshmërisë të praktikave institucionale të ndjekura në të gjitha fazat për miratimin e projektit “Marina e Durrësit & Jahtet”, prishjen e kontratës me kompaninë gjermane EMS. Po ashtu synon të nxirren përfundime mbi nevojën e miratimit, plotësimit apo korrigjimit të ligjeve të veçanta, me qëllim ofrimin e një mbrojtjeje të plotë ligjore dhe institucionale të parimeve të ligjshmërisë, barazisë, konkurrencës, meritokracisë, eficencës ekonomike, mbrojtjes së pronës publike dhe ruajtjes së buxhetit të shtetit në të gjitha kontratat publike që angazhohet qeveria shqiptare”, shprehet PD.
