Partia Demokratike do të protestojë në 8 shkurt kundër qeverisë së drejtuar nga kryeministri Edi Rama.
Kryetari i PD, Sali Berisha duke shfrytëzuar intervistën e ish-numrit 2 të qeverisë Arben Ahmetaj dhe akuzat e tij për korrupsion ndaj kryeministrit Rama, iu bëri thirrje qytetarëve të bashkohen në protestë kundër një qeverie që sipas tij i ka vjedhur shqiptarët për 12 vite
“Të shtunën shqiptarët zbresin në Tiranë dhe Tirana zbret në sheshe dhe rrugë”, tha Berisha.
Duke iu referuar deklaratave të Arben Ahmetaj, lideri i opozitës Berisha akuzoi kryeministrin Rama se ka përdorur taksat e shqiptarëve për të jetuar në luks dhe ka lënë pa mbështetje qytetarët shqiptarë.
“Natyrisht kur vetë hap shishe 33 mijë eurosh, kur shkon në qendra detoksikimi 10 mijë euro java si person me bashkëshorten, kur shpenzon 20 milionë euro me avion taksi, kur blen një vazo 5 milionë euro sikur të ishe sheik apo sulltan, të sëmurët nuk hyjnë kund në radarin tënd, nuk mund të kesh ndjenja ti. Je aq i pashpirt”, shtoi ai.
Berisha përsëriti akuzën për inceneratorin e Tiranës dhe detyrimin që ndërtuesit të paguajnë për depozitimin e dherave
“Arben Ahmetaj në autopsinë e tij ndaj regjimit, ndaj Edi Ramës, kreut të organizatës kriminale, informoi shqiptarët se vetëm me dherat që i paguajnë Edi Ramës dhe Erion Veliajt kompanitë e ndërtimit, të detyruara t’i depozitojnë aty ku do Edi Rama, këta të dy hajdutë kanë fituar mbi 70 milionë euro”, përfundoi kreu i PD-së.
Protesta e fundit që Sali Berisha dhe opozita zhvilluan kundër qeverisë Rama ishte në 23 dhjetor kur opozita bllokoi 5 kryqëzime në Tiranë.
