Dhoma e poshtme e parlamentit austriak ka miratuar një ligj të diskutueshëm që do t’i lejojë autoritetet të mbikëqyrin mesazhet e enkriptuara të të dyshuarve në platforma si WhatsApp ose Telegram, në disa raste.
Pa këtë kuadër ligjor, shërbimi kryesor austriak i inteligjencës dhe policia deri tani janë mbështetur në vendet me kompetenca më të gjera, si Britania dhe Shtetet e Bashkuara, për të marrë informacion rreth sulmeve të planifikuara apo veprimeve të spiunazhit.
Ministri i Brendshëm, Gerhard Karner, e mbrojti ligjin, duke thënë se është i nevojshëm për funksionimin e policisë dhe shërbimeve të inteligjencës në luftën kundër terrorizmit dhe në parandalimin e sulmeve.
Ai theksoi se “nuk ka arsye ideologjike pas këtij vendimi”, por vetëm nevoja praktike. Si shembull i bashkëpunimit ndërkombëtar, përmendet rasti kur një informacion nga jashtë çoi në zbulimin e një sulmi të mundshëm të planifikuar ndaj koncertit të Taylor Swift në Vjenë, gushtin e kaluar, gjë që rezultoi në anulimin e të tre koncerteve të saj, sipas agjencisë Reuters.
Dy parti opozitare në parlament – Partia e Lirisë (FPO) e ekstremit të djathtë dhe të Gjelbrit – votuan kundër ligjit, duke argumentuar se ai mund të çojë në përgjime më të gjera të popullatës sesa ishte parashikuar.
Qeveria, nga ana tjetër, theksoi se mbikëqyrja do të përdoret vetëm për individë që përbëjnë një kërcënim të madh, me një numër të vlerësuar deri në 30 raste në vit.
Çdo rast do të duhet të miratohet nga një trup gjyqësor me tre anëtarë. Megjithatë, një deputet i FPO-së e quajti ligjin “një ndërhyrje të tepruar dhe masive në të drejtat dhe liritë themelore të qytetarëve”.
Pasi të kalojë edhe në dhomën e sipërme dhe të nënshkruhet, do të hapet tenderi për teknologjinë e mbikëqyrjes. Qeveria ka njoftuar se mbikëqyrja do të nisë në vitin 2027.
