Deputetja socialiste Blerina Gjylameti tha se Partia Socialiste synon 20 mandate në Tiranë, e sipas saj ata po kërkojnë votëbesimin për arritjet që kanë pasur në Kryeqytet.
Sipas deputetes kërkimi i 20 mandateve në Tiranë për Partinë Socialiste nuk është çështje numrash por çështje vlerash.
“Pse 20 mandate dhe cilat janë arsyet që ne kërkojmë 20 mandate? Unë e kam shumë të thjeshtë se kam qenë në disa detyra në Tiranë dhe në disa njësi. Nuk është çështje e numrave në vetvete, por ka të bëjë me dhënien llogari të çfarë ke bërë dhe të marrim votëbesimin për çfarë kemi arritur”,-tha Gjylameti.
Sipas saj një nga njësitë që ka ndryshuar tërësisht është njësia 4, por edhe njësia 5 e cila sipas saj ka qenë një nga lagjet më të investuara. Ajo tha se ndonëse kryebashkiaku tani po hetohet, për të do të flasë drejtësia, por sipas saj punët dhe transformimi janë aty.
“Punët janë ato që mbeten, për çështjet e drejtësisë do flasë drejtësia. Ne shikojmë një Tiranë komplet të transformuar. Vota kërkohet për atë që ne na bashkon vlerat në Partinë Socialiste”,-tha Gjylameti.
