Shkup, 2 gusht – Lidhur me ngjarjen në aeroport me Vjosa Osmanin ka reaguar edhe këshilltari i kryeministrit të Kosovës Albin Kurti Bekim Qoku. Qoku që është poashtu pjesë e VLEN i kërkon falje presidentes për siç thotë, veprimet e strukturave të BDI-së.
Në vazhdim postimi i plotë në Fejsbuk.
“Znj presidente Vjosa Osmani,
na falni që ne qytetarët shqiptarë të MV nuk kemi dëshmuar kapacitet:
– që të largojmë më herët nga pushteti partinë që për 20 vjet arrit të dëbojë nga shteti rreth 500 mijë bashkëkombas të juaj shqiptarë;
– që të ndërtojmë 12 km rrugë që lidh MV dhe Kosovën, pra me shtetin me të cilin MV ka pasur gjithmonë një bilanc pozitiv të shkëmbimit tregtar.
– që të shkarkojmë ministrin e Ali Ahmetit, kryesuesi i OSBE-së Bujar Osmani paraqiti propozimin 9 pikësh me çka fovorizonte dukshëm palën serbe kundrejt Kosovës;
– që të largojmë Ali Ahmetin i cili nuk e dënoi kurrë institucionalisht aktin terrorist serb mbi shtetin tuaj në Banjë;
– që largomë nga pushteti Ali Ahmetin dhe partia e tij nuk denjoi as ta ngushëllojë familjen e heroit tuaj Afrim Bunjaku;
– që ta heqim nga froni Ali Ahmetin që i vardisej me nderime dhe përulje presidentit Vuçiq, armikut të përbetuar të shtetit tuaj;
– që ta detyrojmë Ali Ahmetin jo që doli nga Ballkani i Hapur, por e promovoi dhe avancoi atë projekt serb aq të dëmshëm për Kosovën tuaj;
– që ta heqim BDI-në dhe Ali Ahmetin që kanë korruptuar sistemin e drejtësisë deri në atë shkallë sa ish ushtarët e UÇK-së arrestohen e mbahen në paraburgim me urdhërarreste të lëshuara nga autoritetet e shtetit që Kosova e ka armik të përbetuar;
– që ta largojmë Ali Ahmetin dhe BDI-në për 22 vite në pushtet në vend të investojë në rrugë, infrastrukturë, në thellim të marrëdhënieve tregtare, kulturore e sociale me Kosovën ai ka investuar në pasurimin e fëmijëve të tij, nipërve, mbesave, dhëndurëve, të cilët në moshë të re janë bërë pronarë të kompanive super milionëshe;
– që në vend t’ua lehtësojë pacientëve shqiptarë nga Kosova, të cilët i kanë rrjepur në spitalet e MV, ai, bashkë me Artan Grubin, kanakarin e tij, ka investuar vetëm në kazino dhe lotari. Një nga kazinot e ke menjëherë sapo e kapërcen kufirin, znj presidente.
Zn. presidente Vjosa Osmani, Ali Ahmeti dhe partia e tij i ka bërë shumë mëkate këtij populli të vuajtur dhe të nëpërkëmbur në këto 22 vjet. Jo më kot ai po emigron në përmasa egzodi. Fatkeqësisht ai kur ju kërkon falje, nuk e ka për ju, por po keqpërdor prestigjin tuaj për pikë të ulëta politike. Ai abuzon me gjithçka të ndershme shqiptare.”
