Shkup, 25 qershor – Të drejtat e bullgarëve në Republikën e Maqedonisë së Veriut (RMV) nuk mund të jenë objekt pazarllëqesh politike dhe Bullgaria nuk do të pranojë ndryshim të kompromisit evropian të arritur me mund, siguroi Presidenti bullgar Rumen Radev në një letër drejtuar udhëheqësve evropianë që u dërgoi mbrëmë pas seancës së Komitetit të Punëve të Jashtme në Parlamentin Evropian, në të cilën u votua Raporti i Progresit për Maqedoninë.
Radev në letër e kritikon Parlamentin Evropian, duke deklaruar se “është shqetësuese që një institucion i respektuar si Parlamenti Evropian deklarohet në kategori me natyrë morale ose konkretisht shkencore, siç janë ‘identiteti’ dhe ‘gjuha’, pa një bazë ligjore dhe kompetenca të përshtatshme”.
Sipas tij, “referenca të tilla për ‘gjuhën dhe identitetin’ pa përkufizime specifike krijojnë një rrezik interpretimesh të lira, si ato që tashmë i kanë bërë fqinjët tanë jugperëndimorë me pretendimet e tyre për identitetin shekullor maqedonas”.
“Unë e mirëpres vendimin e Parlamentit Evropian për të hedhur poshtë pretendimet për ‘identitetin shekullor maqedonas’ dhe për të mos lejuar përpjekje të reja për të promovuar narrativën nacionaliste etnocentrike të autoriteteve në Shkup. Një qasje e tillë krijon një përballje me komunitetet e tjera etnike në RMV dhe me dy milionë qytetarët bullgarë (të cilët janë gjithashtu qytetarë të BE-së) me origjinë etnike nga territori i Maqedonisë së Veriut të sotme”, thuhet më tej në letër.
Në të, Radev thekson se “brenda votimit të sotëm, u propozua gojarisht të shtohet sqarimi ‘modern’ (në kuptimin e bashkëkohor) para identitetit dhe gjuhës maqedonase, i cili për fat të keq nuk u lejua për votim për shkak të lëvizjeve procedurale të përgatitura me kujdes”.
“Keqkuptime shkaktuan edhe takimet e shumta të parregulluara të raportuesit Waitz me politikanë dhe ekspertë nga RMV (të publikuara vetëm pasi u paraqit një ankesë publike për parregullsi gjatë përgatitjes së raportit). Këto zbulime ngrenë një çështje serioze në lidhje me integritetin dhe transparencën në punën e disa eurodeputetëve dhe zyrtarëve administrativë”, thekson Presidenti bullgar
