Ragmi Mustafi do të jetë kandidat i Partisë për Veprim Demokratik për kryetar të Komunës së Bujanocit.
Këtë e bëri të ditur vetë Mustafi në një postim në Facebook, duke thënë se këtë të mërkurë ka pranuar nominimin për kryetar të Bujanocit për zgjedhjet lokale të 2 qershorit që do të mbahen në Serbi.
“Sot kam pranuar nominimin e Partisë për Veprim Demokratik dega në Bujanoc për kryetar të komunës së Bujanocit, në zgjedhjet e 2 qershorit! Karrierën time politike e kam filluar si shumë i ri, me ëndrrën e madhe, t’i shërbej shqiptarëve të Luginës së Preshevës në përgjithësi, e Komunës së Bujanocit në veçanti”, ka shkruar Mustafi.
Ai më tej ka shtuar se është ndër privilegjet më të mëdha kandidimi i tij për kryetar të Bujanocit.
“Besimin që më dha, fillimisht kryetari i PVD-së, Shaip Kamberi, kryetarit Kuvendit Enver Ramadani, kryesia e anëtarësia e partisë me të cilën u rritëm të gjithë, që pas udhëheqjes më Këshillin Kombëtar Shqiptar të marrim #Bashkë udhëheqjen e Komunës së Bujanocit është ndër privilegjet më të mëdha të jetës sime, andaj FALEMINDERIT”, ka shkruar tutje Mustafi.
Mustafi ka theksuar se sfidat janë të shumta, problemet e mëdha me të cilat komuna jonë vazhdon të ballafaqohet.
“Jam i bindur se bashkë e me përkushtim, do ngadhënjejmë, që fitorja jonë e 2 qershorit te jetë e madhe, e të fillojë një epokë e re, plotë zhvillim e angazhim në përmirësimin e situatës politike, sociale e ekonomike në Bujanoc. Prandaj, sot po bëjmë thirrje për një mobilizim masiv dhe të përkushtuar. Të zgjasim dorën njeri – tjetrin, të respektojmë njëri-tjetrin dhe të përbashkuar të fitojmë.
Nga nesër, çdo ditë deri në ditën e zgjedhjeve, të punojmë e angazhohemi, sepse fitorja jonë nuk është vetëm detyrë, por është domosdoshmëri për vizionin e së nesërmes”, ka shkruar Mustafi.
