Kryeministri Edi Rama ka deklaruar se strukturat shtetërore janë të angazhuara çdo ditë për të garantuar një sezon turistik të sigurt dhe të pastër përgjatë gjithë vijës bregdetare shqiptare.
Në një postim në rrjetet sociale, kreu i qeverisë shkruan se shtimi i plazheve publike ka sjellë rritje të ndjeshme të numrit të pushuesve, duke rritur njëkohësisht edhe përgjegjësitë për mirëmbajtjen e tyre.
POSTIMI I PLOTË:
Me Agjencinë Kombëtare të Bregdetit, agjencitë rajonale dhe strukturat e tjera, jemi çdo ditë në terren, për të monitoruar garantimin e një sezoni turistik të pastër, të rregullt dhe respektim të parcelave publike siç parashikohet në rregulloren e re të menaxhimit të plazheve, ku dyfishimi i aksesit në plazhet publike, shton edhe përgjegjësitë për mirëmbajtjen, pastrimin dhe modelin qytetar në respektimin e hapësirave të përbashkëta.
