Kryetari i Partisë për Liri, Drejtësi dhe Mbijetesë (PLDM) dhe njëherësh ministër në detyrë për Komunitete dhe Kthim, Nenad Rashiq, është regjistruar sot si deputet i ardhshëm i Kuvendit të Kosovës.
Pas përfundimit të regjistrimit ai para mediave tha se do të marr pjesë nesër në seancën konstitutive të legjislaturës së nëntë të Kuvendit të Kosovës, dhe se do të votoj për zgjedhjen e kryepalamentarit.
“Do të shohim nesër, do të marrim pjesë në seancë normalisht. Po nëse ka ndonjë propozim që është i arsyeshëm për kryeparlamentar do ta votojmë. Këtë rast LVV ka të drejtën e propozimit të kryeparlamentarit prandaj nuk e shoh ndonjë problem aty në atë aspekt”, tha Rashiq.
Ai tutje tha se sa i përket asaj se a janë numrat, nuk është përgjegjësi e tij.
Ministri në detyrë tutje u shpreh se nuk është optimist që nesër do të votohet edhe krijimi i qeverisë dhe se procesi për krijimin e saj është i gjatë.
Rashiq nuk përjashtoi mundësinë e ndonjë ngërçi të shkurtë politik.
“Nuk jam optimist që do të votojmë nesër për qeverinë…Proces i gjatë nuk është hera e parë që mund të ndodh ndonjë ngërç i shkurtë, kemi pasur rastin në 2014 kur për dy-tre muaj pastaj u zgjidh ajo krizë”, tha Rashiq.
Rashiq theksoi se varianti më i mirë është që LVV ta formojë qeverinë si partia më e madhe, sepse sipas tij çdo opsion tjetër do ta komplikonte procesin.
“Në këtë rast po konsideroj se variant më i mirë do të ishte që partia më e madhe të formonte qeverinë sepse çdo opsion tjetër do të komplikonte shumë më shumë procesin, qoftë demokratizimin, udhëheqjen qeveritare qoftë afrimin e Kosovës drejt BE-së. Opsioni më i mirë është që partia më e madhe të marrë udhëheqjen”, ka thënë Rashiq.
Ai u pyet edhe për shantazhet ndaj serbëve të Kosovës, ku tha se kjo nuk është diçka e re.
“Shantazhet janë prej 2013 nuk është diçka e re. Unë e di që kanë ndodh e po ndodhin ndaj politikës që përfaqësoi unë, bashkëpunëtorëve të mi. Keni parë atë mitingun e madh që ndodhi në Serbi dhe të gjithë ata që kanë shkuar nga Kosova atje kanë qenë të shantazhuar”, tha Rashiq.
