Autoriteti Rrugor Shqiptar njoftoi se gjatë natës kanë vazhduar reshjet e shiut duke sjellë rënie gurësh në trup të rrugës si në Skurraj-Maqellarë, Kukës-Ura e Zapodit dhe në Tropojë.
Grupet e punës të ndodhura në terren kanë bërë menjëherë pastrimin.
Ndërkaq, në zonën veriore në Hani i Hotit-Tamarë, Tamarë-Vermosh dhe Bogë-Theth ka pasur reshje dëbore. Mjetet borëpastruese kanë vijuar punën për pastrimin e akseve nga dëbora dhe shpërndarjen e kripës.
ARRSH njoftoi se qarkullimi kryhet pa probleme në të gjitha akset nacionale.
“Drejtuesit e mjeteve të kenë kujdes të shtuar gjatë drejtimit të mjetit për shkak të lagështisë në rrugë, të pajisen me goma dimërore dhe zinxhir kur udhëtojnë për në zonat malore me prezencë dëbore”, apeloi ARRSH.
