Shkup, 2 janar – “Hapësirat gjelbëruese që shihni mbrapa meje tashmë janë shndërruar në deponi të egra. Gjendemi për momentin në rrugën që shpie drejt fshatit Rashçe të Komunës së Sarajit ku sipas komunës është edhe një ndër pikat më kritike ku vazhdimisht krijohen deponi të egra, pavarësisht që të njëjtat pastrohen nga ana e ndërmarrjes komunale”, raporton Melihate Rustemi, gazetare.
Deponi të egra vazhdimisht krijohen edhe nëpër rrugët e disa vendbanimeve tjera të Komunës së Sarajit ku persona të pandërgjegjshëm hedhin mbeturina nga më të ndryshmet ose çdo gjë që është e tepërt në shtëpitë e tyre. Përveç që ndotin ambientin, mbeturinat e hedhura vend e pa vend paraqesin rrezik edhe për përhapje të infeksioneve të ndryshme. Ilas Veseli, ushtrues detyre, kryetar I Komunës së Sarajit tha se pavarësisht zhdukjes së këtyre deponive të njejtat krijohen brenda natës nga persona të caktuar.
“Ka disa persona të cilët bëjnë shërbime, bartje të mbetjeve të prishjeve të mureve të ndryshme, mbetje ndërtimi dhe të njëjtat nga komunat tjera sillen në territorin e komunës tonë. Ne, si komunë dhe inspektorë të që kemi në kuadër të komunës nuk mundemi 24 orë t’i mbulojmë të gjitha vendbanimet, sado që të jemi të ekipuar nuk mund t’i mbulojmë të gjitha vendbanimet. Do të nevojitet një bashkëpunim më i thellë dhe më korrekt me banorët e vendbanimeve të caktuara”, deklaroi Ilas Veseli, u.d kryetar I Komunës së Sarajit.
Derisa qëndruam në qendër të Sarajit takuam edhe shumë banorë të fshatrave të kësaj komune të cilët u shprehën pjesërisht të kënaqur me mirmbajtjen e pastërtisë nëpër fshatra. Disa u ankuan se pagesa për shërbimet komunale është e papërballueshme ndërsa shumë të tjerë u ankuan për mungesë të kontejnerëve dhe shporta mbeturinash.
“Është shtrenjtë për banorët të blejnë shportë mbeturinash. Ndoshta unë mund t’ia lejoj vetes por ka banorë që vuajnë për bukë”, tha një banor i fshatit Lubin.
“ Asnjiherë nuk kemi qenë të kënaqur dhe nuk do të jemi. Parat na I marrin. Vijnë I zbrazin kontejnerët në kamion, derdhen mbeturinat në tokë dhe ashtu I lënë, ku shkruan ashtu”, u shpreh një banor I fshatit Çajlanë.
“Nuk flasim për çmimin, flasim për shërbimin që të jetë si duhet. Për atë shërbim që e paguajmë duhet të ketë mbikëqyrje, të jetë funksionalsi duhet”, theksoi një banor I fshatit Llaskarcë
Banorët e Sarajit për shërbimet komunale duhet të ndajnë 315 denarë në muaj. Sipas të dhënave nga Komuna, gjatë vitit 2023 shërbimet komunale I kanë shlyer mbi 50 % e banorëve. Ndërkohë, gjatë vitit 2024 kjo pagesë duket se ka shënuar rritje. Vetëm në gjashtë muajt e parë të vitit të vitit që lëmë pas pagesa për shërbimet komunale ka arritur në 50 %.// Alsat
