Sot në orën 10:00 pritet të mbahet përpjekja e radhës për ta konstituuar Kuvendin e Kosovës, pas gjashtë seancave të pasuksesshme për zgjedhjen e kryetares së re të Kuvendit. Lëvizja Vetëvendosje (LVV), si partia fituese e zgjedhjeve të fundit, ende nuk ka arritur të sigurojë shumicën prej 61 votash për të emëruar Albulena Haxhiun në krye të Kuvendit.
Në seancën e fundit, LVV, përmes kryesuesit të seancës Avni Dehari, tentoi të ndryshojë mënyrën e votimit në përpjekje për të kaluar bllokadën, duke propozuar votimin e fshehtë. Sipas përfaqësuesve të saj, kjo metodë do t’u jepte deputetëve më shumë liri për të votuar pa presion politik. Kjo kërkesë, megjithatë, nuk u miratua.
Deputeti i LVV-së, Hekuran Murati, përmes një reagimi të publikuar vonë të premten, përsëriti kërkesën për votim të fshehtë dhe i bëri thirrje opozitës që të mbështesë kandidaturën e Haxhiut. Sipas tij, një votim i tillë përkon edhe me rekomandimet e Gjykatës Kushtetuese dhe do të ndihmonte në tejkalimin e bllokadës institucionale.
Megjithatë, opozita ka treguar një qëndrim të prerë. Kryetari i LDK-së, Lumir Abdixhiku, refuzoi ftesën e dytë të Albin Kurtit për një takim konsultativ, ndërsa partitë tjera opozitare kanë bërë të qartë se nuk do ta përkrahin kandidaturën aktuale të Vetëvendosjes, përveç nëse ajo ndryshon.
Vetëvendosja ka provuar gjithashtu të sigurojë përkrahjen e disa deputetëve të pavarur dhe të minoriteteve jo-serbe. Janë raportuar përpjekje për të bindur Fatmir Limajn dhe deputeten Duda Balje, por asnjëri prej tyre nuk ka pranuar të mbështesë kandidaturën e Haxhiut. Limaj thuhet se kërkon një marrëveshje më të gjerë për bashkëpunim qeverisës, ndërsa Balje është në bisedime për t’iu bashkuar grupit parlamentar të AAK-së.
Nëse edhe sot dështon zgjedhja e kryetares së Kuvendit, kriza institucionale mund të thellohet më tej. LVV mbetet përballë një vendimi të vështirë: të këmbëngulë në kandidaturën aktuale apo të hapë rrugë për një kompromis që do të mundësonte konstituimin e Kuvendit dhe formimin e institucioneve të reja.
