Sot zhvillohet takimi i radhës në kuadër të dialogut mes Kosovës dhe Serbisë, në nivel kryenegociatorësh.
Kosova përfaqësohet nga zëvendëskryeministri, Besnik Bislimi, ndërsa Serbia nga drejtori i Zyrës për Kosovën në Qeverinë e Serbisë, Petar Petkoviq.
Ditë më parë të dy palët kanë konfirmuar pjesëmarrjen e tyre në këtë takim, ndërkaq zëdhënësja e BE-së për Politikë të Jashtme dhe Siguri, Anitta Hipper, ka thënë se në këtë takim do të shqyrtohen një varg çështjesh, përfshirë edhe zbatimin e Marrëveshjes drejt normalizimit të marrëdhënieve.
Ndryshe, emisari i Bashkimit Evropian për dialogun Kosovë-Serbi, Miroslav Lajçak, ditë më parë ka bërë të ditur se javët e fundit kanë qenë plot angazhime diplomatike dhe përpjekje për avancimin e prioriteteve kryesore të Bashkimit Evropian.
“Udhëheqësit e rinj të BE-së, që në javën e parë të tyre në detyrë, u takuan me liderët e Ballkanit Perëndimor, duke dërguar një sinjal të qartë se zgjerimi i BE-së është prioritet”, është shprehur Lajçak, duke theksuar angazhimin e institucioneve evropiane ndaj rajonit.
