Prokuroria e Posaçme ka nisur verifikimet në lidhje me kontratën e lobimit të Partisë Demokratike, mëson MCN TV.
Bëhet fjalë për kontratën me kompaninë amerikane “Continental Strategy”, e publikuar së fundmi në media, e cila ka si qëllim lobimin pranë qeverisë amerikane për një periudhë dy vjeçare.
Në kontratën e firmosur nga sekretari i përgjithshëm Flamur Noka, thuhet se PD do t’i paguajë kompanisë amerikane 6 milionë dollarë për dy vite.
Pikërisht kjo shifër dhe burimi i të ardhurave të financuesve, po verifikohen nga SPAK.
PD ka parapaguar 750 mijë dollarë ndërsa pjesën tjetër do ta paguajë me 250 mijë dollarë në muaj gjatë periudhës që është në fuqi kontrata.
Në një reagim të mëhershëm selia blu ka thënë se kontrata është e sponsorizuar nga komuniteti shqiptaro-amerikan në New York nëpërmjet organizatës “Make Albania Great Again”.
