Kryetarja e Kuvendit, Elisa Spiropali deklaroi sot se, kërkesa për interpelancë duhet të bazohet mbi të vërteta dhe në nevojën për kontroll parlamentar.
Në përgjigje të kërkesës së kryetarit të grupit parlamentar të Partisë Demokratike, Gazment Bardhi për një interpelancë me Kryeministrin Edi Rama lidhur me çështjen “Becchetti”, Spiropali tha se, “ju vërtetë i keni bërë kërkesë Kuvendit për një interpelancë me Kryeministrin dhe sigurisht që referuar nenit 96 që përcakton dhe objektin e interpelancave dhe e them për sot, po e them edhe për çdo herë tjetër që kërkohet një interpelancë në Kuvendin e Shqipërisë, të cilën ne të gjithë e konsiderojmë shumë të rëndësishëm si mjet të kontrollit parlamentar, interpelanca është kërkesa me shkrim që i drejtohet kryeministrit, zv/kryeministrit, ose çdo anëtari tjetër të kabinetit qeveritar, mbi motivet, synimet, qëndrimet të Këshillit të Ministrave lidhur me aspekte të rëndësishme të veprimtarisë së tij”.
Spiropali nënvizoi se, “në asnjë moment nuk thuhet që interpelanca nuk duhet të jetë e paraqitur e plotë apo të ketë fakte aty që nuk bazohen mbi asnjë fakt të këtij shteti, siç ju pretendoni që kërkesa për interpelancë bazohet mbi një pagesë të shtetit shqiptar për këtë shtetas. Kjo nuk ekziston dhe derisa të ma sillni, ju lutem, atëherë do të shqyrtohet me seriozitetin që meriton”.
Sigurisht, shtoi Spiropali, “që duhet patjetër të bazohet në të vërteta, të bazohet në nevojën për kontroll parlamentar dhe jo në nevojën për propagandë të ditës mbi fakte të pavërteta”.
“Bazuar në këtë paragraf të 3, të nenit 89 të Rregullores, Kryetari i Kuvendit ka të drejtë të mos ta përfshijë interpelancën në rend dite për çështje që nuk janë nën përgjegjësinë e Këshillit të Ministrave, në kuptimet e kompetencës që i ka dhënë nenit 85 e vijues i Kushtetutës së Shqipërisë”, tha Spiropali.
“Jemi të gatshëm në çdo kohë, patjetër, unë do të ushtroj detyrën time kushtetuese. Bëjeni dhe ju lutem duke sjellë interpelanca që janë në formë, germë sipas Kushtetutës dhe Rregullores së Kuvendit dhe ato të gjitha do të përfshihen në rendin e ditës”, u shpreh Kryeparlamentarja.
“Mos merrni fakte të paqena që nuk bazohen mbi asnjë dokument të shtetit shqiptar, t’i bëni copy-paste në një kërkesë për interpelancë, dhe atë t’ia sillni Kryetares së Kuvendit, e cila në çdo rast e ka paraqitur në Konferencën e Kryetarëve”, tha Spiropali.
“Asnjë interpelancë nuk është lënë pa trajtuar, po patjetër do të diskutohen dhe do të trajtohen interpelancat që janë të bazuara mbi fakte dhe në kërkesën për të nxjerrë në dritë interesin publik”, u shpreh Spiropali.
Kuvendi rrëzoi më pas me shumicë votash kërkesën e kryetarit të Grupit Parlamentar të Partisë Demokratike, Gazment Bardhi për një interpelancë me Kryeministrin Edi Rama për çështjen “Bechetti”.
