Shkup, 19 mars – Gjendja e pacientëve të lënduar nga zjarri në klubin “Puls” në Koçan të hospitalizuar në SPQ “8 Shtatori” në Shkup është stabile për nga parametrat vital. Së bashku me ekipe nga qendra të specializuara jashtë vendit, kryhen operacione për të hequr indet e vdekura të shkaktuara nga djegiet dhe për t’u dhënë hapësirë plagëve që ngadalë të fillojnë të shërohen, informoi drejtori i SPQ “8 Shtatori”, Sinisha Stojanovski.
Në konferencën e sotme për media në Qeveri, ai potencoi se mëngjesin e sotëm janë trajtuar 15 pacientë, ndërsa planifikohet që gjatë ditë ndërhyrje të tilla të kryhen edhe tek tre pacientë.
“Në këto pak ditë jo vetëm që është monitoruar përkeqësimi potencial i pacientëve, por u desh të intervenohet edhe në dëmtimet e atyre pacientëve të cilët nuk ishin në gjendje kritike në fazën e parë, dhe as në gjendje të rrezikshme për jetën. Proceset e triazhit dhe monitorimit të pacientëve janë duke u zhvilluar paralelisht. Plagët duhet të fashohen vazhdimisht dhe indet e vdekura duhet të hiqen për të lënë hapësirë që plaga të fillojë ngadalë të shërohet. Pikërisht në këtë drejtim janë dhe ndërhyrjet operative”, tha Stojanovski.
Ndërhyrjet, siç tha ai, kryhen si rezultat i ekstenzitetit, gjegjësisht përmasave të përqindjes së trupit e cila është e prekur nga djegiet, ndërsa jo sepse janë në gjendje të rrezikshme për jetën.
