Shkup, 8 mars – Në Ministrinë e Punëve të Jashtme të Republikës së Maqedonisë së Veriut u mbajt takimi i dytë i drejtorëve politikë të pjesëmarrësve në Procesin e Bashkëpunimit të Evropës Juglindore (PBEJL), në të cilin ishin të pranishëm përfaqësues të Këshillit për Bashkëpunim Rajonal (RCC) dhe të Bashkimit Evropian.
Maqedonia e Veriut kryeson me Procesin e Bashkëpunimit në Evropën Juglindore në periudhën korrik 2023 – qershor 2024, nën moton “Tejkalojmë ndarjet, ndërtojmë besim”.
“Në takim u shkëmbyen mendime për çështjet aktuale me interes për rajonin dhe ndikimin e tyre në bashkëpunimin rajonal, Planin për Zhvillimin e Ballkanit Perëndimor të Bashkimit Evropian dhe ndikimin e situatës aktuale gjeopolitike në procesin e integrimit evropian, për mbështetjen e integrimit evropian dhe zhvillimin e qëndrueshëm përmes bashkëpunimit ndërmjet pjesëmarrësve në proces, si dhe për aktivitetet aktuale të kryesimit të Maqedonisë së Veriut me këtë iniciativë”, njoftoi MPJ-ja.
Republika e Maqedonisë së Veriut është pjesëmarrëse në Proces që nga formimi i tij dhe kryeson për herë të tretë, pas kryesimeve në vitet 2000-2001 dhe 2012-2013.
