Koçani, 26 prill – Është koha të pritet zinxhiri i krimit dhe të sillet drejtësia në dritë, sepse edhe harabelat e dinë për korrupsionin dhe të keqen që mbretëron në vendin tonë, porositën prindërit e viktimave të zjarrit në klubin “Puls” në marshin e katërt protestues “Reagim i vonuar” që u zhvillua sot në Koçan.
Në mesazhin drejtuar institucioneve përgjegjëse për funksionimin e sistemit në shtet, ata kërkuan që të mos i shmangen përgjegjësisë dhe të kuptojnë dhimbjen që ndiejnë për fëmijët e tyre.
“A do të mbuloni njerëz që ishin bashkëpunëtorë nëse fëmijët e vrarë do të ishin tuajët? Ndoshta atëherë do ta kuptoni se e vetmja kauzë për të cilën po luftojmë është drejtësia për fëmijët tanë të vegjël të vrarë. Edhe paraprakisht, tani dhe në të ardhmen, ju kujtojmë se nuk do të ndalemi këtu, do të shihemi në vende të tjera, më të fortë. Ky është vetëm fillimi i luftës sonë për jetët që përfunduan shumë shpejt, për ëndrrat e tyre të parealizuara, për rininë e tyre të ndërprerë dhunshëm. Duhet të ketë drejtësi dhe të gjithë bashkëpunëtorët në këtë vrasje duhet të mbahen përgjegjës para ligjit”, tha Julia Zllatkova, nëna e një viktime në zjarr.
Gjatë ndërprerjes së shkurtër të marshimit përpara ndërtesës së Komunës së Koçanit, ku ndodhen shërbimet shtetërore të inspektimit, u bë një pyetje nëse ata kishin nevojë për trajnim shtesë për të qenë në gjendje të kryenin në mënyrë efektive detyrat e tyre të punës.
Përpara Stacionit të Policisë në Koçan, pjesëmarrësit në marsh kërkuan përgjegjësi nga policët që më parë nuk kishin arritur ta parandalonin tragjedinë në “Puls”.
Para Gjykatës Themelore dhe Prokurorisë, prindërit dhe të afërmit e të ndjerit thanë se drejtësia duhet të vihet në vend dhe fajtorët e vërtetë për aksidentin duhet të shpallen.
Marshi protestues përfundoi në Parkun e Revolucionit, ku edhe filloi, dhe të afërmit e viktimave thanë se do të vazhdojnë me tubimet dhe në periudhën në vijim do të jenë edhe më të zëshëm në kërkesat e tyre për drejtësi.
