Shkup, 20 shtator – Institucionet bullgare tregojnë unanimitet vetëm për çështjen maqedonase, të gjithë jemi unikë. Për herë të parë shoh unanimitetin e të gjitha forcave politike, është e mrekullueshme. Kështu ka thënë për “BNR” Kiril Topalov, ish-diplomat bullgar dhe anëtar i komisionit të përzier maqedono-bullgar për çështje historike, përcjell Telegrafi Maqedoni.
“Ne duhej të bashkoheshim kundër sjelljeve të papranueshme të këtij vendi, i cili ka qenë pjesë e shtetit bullgar gjatë gjithë ekzistencës së tij. Ky vend u shpëtua nga hakmarrja e keqe e Millosheviçit gjatë shpërbërjes së Jugosllavisë dhe Bullgaria menjëherë nënshkroi një marrëveshje dhe e njohu, ne i dhamë armë Maqedonisë së Veriut kundër bandave shqiptare, Selaniku ua mbylli portin e tij dhe Burgasi u bë port për RMV-në. Ne e mbrojtëm RMV-në, ndërsa Serbia përfitoi nga kjo”, komentoi Topalov.
“Unë gjithmonë i them komisionit dhe mediave se Shkupi është fatalisht i varur nga Beogradi, dhe Beogradi nga Moska. Këto gjëra duhet të merren parasysh kur ka provokime. Atyre nuk duhet kushtuar shumë vëmendje, por as nuk duhen lënë pa përgjigje. Kjo shoqëri është e helmuar. Këtu populli voton, sado të falsifikojnë zgjedhjet, shoqëria e tij është antibullgare, duhet të njihet”, tha Topalov.
Ai ka komentuar edhe vizitën e Gordana Siljanovska Davkovës te presidenti bullgar Rumen Radev dhe ka sqaruar se vizita ka qenë miqësore dhe nuk ka pasur shkelje të protokollit.
