Vendimi për rritjen e trajtimit financiar për 6000 efektivë të Forcave të Armatosura ka hyrë në fuqi nga 1 janari 2025. Ministri i Mbrojtjes, Pirro Vengu thotë se ky vendim për ushtarakët po jep frytet e para në objektivin që ka Ministria e Mbrojtjes për t’i bërë Forcat e Armatosura edhe më tërheqëse për brezin e ri.
Sipas ministrit Vengu, ky interes i shtuar ka sjellë jo vetëm rritjen e numrit, por edhe të cilësisë së rekrutëve, të cilët e vlerësojnë aktivizimin në Forcat e Armatosura si një mundësi afatgjatë për të bërë karrierë.
“Me angazhimin e trupave tona në misionet ndërkombëtare, rekrutët e rinj kanë mundësi që në një të ardhme të afërt të jenë përkrah trupave aleate dhe partnere, duke përfaqësuar Shqipërinë me profesionalizëm dhe dinjitet”, shprehet ministri Vengu.
“Jam ushtar i parë, Eglant Damiani. Jam pjesë e FA të Shqipërisë prej gjashtë muajsh. Kam ardhur në kursin SIA dhe kursi po ecën shumë mirë në batalionin Komando. Pjesa më e vështirë ishte fillimi i karantinës gjatë stërvitjes individuale bazë. Dua të jem pjesë e Forcave Komando, sepse kjo është forca më elitë në Shqipëri. Rroga po rritet çdo kohë dhe ne jemi shumë të kënaqur. I ftoj të gjithë të rinjtë që të bashkohen në FA për të dhënë kontributin e tyre si shtetas shqiptarë”, thotë ai.
Vendimi për rritjen e trajtimit financiar të efektivëve të Forcave të Armatosura është botuar në Fletoren Zyrtare nr. 175/2024 pas miratimit nga Këshilli i Ministrave.
Nga ky vendim përfitojnë shtesë të trajtim financiar rreth 6000 efektivë të FA, prej të cilëve 2500 efektivë e marrin atë për herë të parë.
Trajtim më të mirë financiar do të përfitojnë edhe kapacitete kombëtare si: Forcat Speciale, pilotët, inxhinierët dhe teknikët e mirëmbajtjes, njësia cyber, dronët, forcat e dedikuara për emergjencat civile dhe shumë e shumë kapacitete të tjera.
