Në prag të festave të 28-29 Nëntorit, nxënësit dhe gjimnazistët po ia shtojnë atmosferën qyteteve dhe fshatrave duke sjellë shfaqje të veçanta të mbushura me simbolikën kuqezi por edhe me krenarinë e punimeve që dalin prej vetë duarve të tyre.
Festime të tilla përmes programit të krijmtarisë në art dhe zeje, solli edhe shkolla “Ndre Mjeda” në Shkodër.
Kryeministri Edi Rama përcolli urimin e nxënësve të kësaj shkolle përgatitur me shumë dashuri.
“Urim emocionues nga nxënësit e shkollës “Ndre Mjeda”, përgatitur përmes programit “Art dhe Zeje”, me shumë dashuri për Shkodrën dhe gjithë Shqipërinë”, vuri në dukje Kryeministri Rama në rrjetet sociale.
Gjatë këtyre ditëve, Kryeministri ka ndarë me publikun edhe shfaqje të tjera të veçanta të festimeve për festën kombëtare dhe atë të çlirimit.
Atmosfera e Festave të Nëntorit, po ndihet në çdo shkollë në kryeqytet.
Krahas simboleve kombëtare, si flamujt dhe veshjet kuqezi të nxënësve, programet si “Art dhe Zeje”, përmes vizatimeve e pikturave, po nxisin edhe më shumë kreativitetin e fëmijëve me rastin e 113-vjetorit të Pavarësisë dhe 81-vjetorit të Çlirimit.
