Drejtori i Policisë së Shtetit Muhamet Rrumbullaku doli këtë të mërkurë në një konferencë për mediat për të folur rreth ngjarjes së rëndë në Pogradec, ku 42-vjeçari Egli Proga u rrah brutalisht deri sa humbi jetën.
Familjarët e Progës kanë hedhur aludimet se ngjarja është tentuar të fshihet nga policia e shtetit dhe nëse do ishte vepruar më shpejt, Proga mund të ishte ende gjallë. Rrumbullaku tha se nuk ka asnjë fakt që policia ka tenuar të fshehë ngjarjen.
Rrumbullaku tha gjithashtu për mediat se ngjarja në Pogradec nuk ka të bëjë me gjobvënien, por me një konflikt të çastit.
Rrumbullaku tha gjithashtu se akuzat se Policia e Shtetit ka tentuar të fshehë ngjarjen e rëndë ku Egli Proga u rrah për vdekje në Pogradec, janë të pabaza.
“Aludimi se është tentuar të fshihet ngjarja është i pabazë dhe me asnjë provë apo fakt konkret. Në asnjë moment dhe asnjë rrethanë asnjë punonjës i policisë nuk ka tentuar të fshijë apo të minimizojë ngjarjen e rëndë. Policia ka shkuar menjëherë në ngjarje, janë sekuestruar kamerat, janë shoqëruar disa persona që ishin të pranishëm në momentin e ngjarjes janë kryer të gjitha veprimet me qëllim zbardhjen e ngjarjes. U identifikua dhe u arrestua autori së bashku me 3 shtetas të tjerë të cilët akuzohen për moskallëzim krimi. Baltosja e policisë së shtetit është jo vetëm e pabazuar por edhe e dënueshme ligjërisht e moralisht. Policia e shtetit do të marrë hapa ligjor për dezinformimin e kësaj ngjarje”, tha Drejtori i Policisë.
