Shkup, 20 korrik Zhurnal.mk – Masat nga Plani Operativ për Punësim duhet të jenë më të qasshme për zejtarët, me procedura më të thjeshtuara për aplikim dhe shpërndarje transparente të mbështetjes, ka kërkuar Oda e Zejtarëve në takimin me zëvendësministrin e Ekonomisë dhe Punës, Marjan Risteski.
Në takim u diskutua për masat aktuale të Planit Operativ, ndërsa Risteski theksoi se interesimi më i madh është për masën “Mbështetje për krijimin e vendeve të reja të punës”, si dhe për masën “Trajnim në vendin e punës te një punëdhënës konkret”.
Kryetari i Odës së Zejtarëve, Goran Ristovski, vlerësoi se këto masa janë një mbështetje e rëndësishme për sektorin, veçanërisht në kushtet e mungesës së fuqisë punëtore dhe largimit të të rinjve.
“Është shumë e rëndësishme që këto masa të jenë të arritshme për çdo zejtar, procedura e aplikimit të jetë e thjeshtë dhe procesi i ndarjes së mjeteve të jetë transparent”, tha Ristovski.
Risteski u bëri thirrje personave të papunë dhe zejtarëve që të shfrytëzojnë mundësitë që ofron Plani Operativ dhe të aplikojnë në Agjencinë për Punësim.
Masa “Trajnim në vendin e punës te një punëdhënës konkret” parasheh trajnim për 50 persona të papunë në periudhë prej tre muajsh. Pjesëmarrësit do të marrin kompensim mujor prej 12 mijë denarësh, ndërsa punëdhënësit do të marrin mbështetje njëherëshe prej 30 mijë denarësh për çdo person të trajnuar.
Pas përfundimit të trajnimit, punëdhënësit kanë obligim të punësojnë së paku gjysmën e pjesëmarrësve të trajnuar për një periudhë minimale prej tre muajsh.
Thirrja publike për këtë masë është e hapur deri më 30 nëntor 2026, përkatësisht deri në plotësimin e numrit të paraparë të pjesëmarrësve.
Në vijim është edhe thirrja publike për masën “Punësim dhe rritje e subjekteve juridike”, përmes së cilës mikro, ndërmarrjet e vogla dhe të mesme, ndërmarrjet sociale dhe organizatat qytetare mund të marrin mbështetje financiare për hapjen e vendeve të reja të punës.
Mbështetja arrin nga 160 mijë deri në 250 mijë denarë për person, ndërsa shuma maksimale që mund të marrë një kompani është deri në 1.25 milionë denarë. Thirrja është e hapur deri më 24 korrik.
Sipas Risteskit, qëllimi kryesor i Planit Operativ është ulja e papunësisë dhe mbajtja e të rinjve, veçanërisht personave deri në moshën 29 vjeç, në tregun vendor të punës.
