Shkup, 13 gusht – Komisioni për çështje të zgjedhjeve dhe emërimeve në seancën e sotme i ka miratuar kërkesat e Enver Huseinit, ish-zëvendësministër i Punës dhe Politikës Sociale, Aleksandar Bajdevskit, ish-zëvendësministër për Shoqëri Informatike dhe administratë, Nazim Bushi, ish zëvendësministër i Punëve të Brendshme dhe Filip Nikoloski, ish-zëvendësministër i Financave që të marrin apanazh pas përfundimit të marrëdhënies së punës.
Gjithashtu, anëtarët e Komisionit për zgjedhje dhe emërime në seancën e sotme e kanë përcaktuar kërkesën për realizim të pagës pas përfundimit të postit të zëvendëssekretarit të përgjithshëm të Kuvendit, Miki Milkovskit dhe Nexhbedin Ibraimit.
Komisioni sot ka marrë vendim për caktimin e kompensimit të qirasë për deputetet Lidija Petkovska dhe Angelina Petkova. Komisioni ka miratuar edhe vendimin për realizimin e pagesës së largimit pas pensionimit për ish-deputetin Mirosllav Jovanoviq.
Në seancën e sotme anëtarët e Komisionit për zgjedhje dhe emërime e përcaktuan vendimin për shkarkimin e anëtarëve të Komisionit për Agjencinë e Komunikimeve Elektronike. Kjo është shtuar si pikë në rendin e ditës të seancës me propozim të deputetes Eli Panova.
Duke elaboruar pikën e propozuar të rendit të ditës, Panova theksoi se gjatë zgjedhjes së anëtarëve të Komisionit për Agjencinë e Komunikimeve Elektronike janë përzgjedhur personel që nuk i plotëson kushtet e parashikuara në nenin 16 të Ligjit për komunikime elektronike, si dhe nënvizoi se ka pasur shkelje të vazhdueshme të Ligjit për komunikime elektronike.
Anëtarët e Komisionit për zgjedhje dhe emërime e kanë përcaktuar vendimin për shkarkimin e anëtarëve të Bordit të drejtorëve të Agjencisë për rregullimin e sektorit hekurudhor, i cili u vu në rend dite me propozim të deputetit Jovan Jauleski.
Si arsye për shkarkimin Jauleski e ka përmendur shkeljen e dispozitave dhe rregulloreve të miratuara në bazë të ligjit gjatë kryerjes së funksionit.
Kryetari i Komisionit për zgjedhje dhe emërime, Gjorgija Sajkoski, ka treguar se ka nënshkruar vendim për ndërprerjen e apanazhit të Jeton Nezirit, ish-anëtar i Komisionit shtetëror për vendimmarrje në procedurë administrative për marrëdhënie pune të shkallës së dytë, sepse është emëruar drejtor i Ndërmarrjes publike “Higjiena Komunale” të Shkupit.
E drejta për të marrë pagë edhe pas përfundimit të detyrës është vendosur me vendim të Komisionit për çështje të zgjedhjeve dhe emërimeve dhe për ta ushtruar të njëjtën deri më 18 tetor të vitit 2024. Jeton Neziri është emëruar ushtrues detyre i drejtorit të Ndërmarrjes publike “Higjiena Komunale” në Shkup, nga 8 gushti. Me vendim është përcaktuar ndërprerja e ushtrimit të së drejtës së apanazhit që nga 7 gushti i këtij viti.
Anëtarët e Komisionit në seancën e sotme e kanë përcaktuar edhe propozim-vendimin për shkarkimin dhe emërimin e kryetarit dhe anëtarëve të Këshllit për ndarjen e çmimit shtetëror “8 Shtatori”.
