Në Komisionin për Çështjet Ligjore, Administratën Publike dhe të Drejtat e Njeriut u diskutua projektvendimi për miratimin e strukturës, organikës dhe klasifikimin e pagave të personelit me kohë jo të plotë pune të Komisionit Qendror të Zgjedhjeve.
Me 14 vota pro dhe një kundër, ky projektvendim u miratua. Vendimi lidhet me punësimin e personelit, rreth 394 punonjës me kohë të pjesshme në kuadër të menaxhimit dhe administrimit të procesit zgjedhor lidhur me zgjidhjet parlamentare të pranverës së vitit 2025.
Por, përpara votimit final, pati disa diskutime në radhët e deputetëve dhe pjesëmarrësve në këtë komision.
Enkelejd Alibeaj, si drejtues i partisë më të re opozitare “Djathtas 1912”, u shpreh se mungesa e votimit elektronik në të gjithë Shqipërinë në zgjedhjet e ardhshme të 2025-ës është një goditje që i bëhet procesit zgjedhor.
“KQZ ka sjellë një propozim të partive politike që votimi elektronik në dy qarqe, Elbasan dhe Durrës dhe kjo është goditja më e madhe që i jepet legjitimitetit të zgjedhjeve. PS ka sugjeruar edhe Tiranën në fakt, ndërsa PD ka kërkuar që as këto dy qarqe të mos bëhen. Pesë mijë e ca qendra votimi në Shqipëri, vota që monitorohen nga përfaqësues të partive, kjo është goditja më e madhe që i jepet një procesi zgjedhor. Kam pyetur Celibashin se sa shkon fatura për ta implementuar votimin elektronik në gjithë Shqipërinë dhe ai ka thënë diku te 40 milionë dollarë apo euro. Nëse këto aparatura blihen, vetëm një herë, përfitimi është shumë i madh, sepse shmanget numërimi nga komisionerë partiakë dhe për pasojë vjen edhe depolitizimi i administratës publike. KQZ ka një faturë totale për mbulim me votimin elektronik në të gjithë Shqipërinë, qeveria t’i përgjigjet, të bëhet edhe depolitizimi i administratës zgjedhore. Për të gjitha këto arsye, vota ime është kundër”, tha Alibeaj gjatë punimeve të këtij komisioni.
Deputeti Qefalia reagoi pas fjalës së Alibeajt, duke u shprehur: “Nuk dua ta paragjykoj, por kur dëgjoj që Enkelejdi flet për këto gjëra tani, e mbështes dhe jam dakord për gjithçka që ai shprehet. Jo sot, që ai ka mbetur vetëm dhe nuk gjen dot komisionerë, por pse nuk e thoshe dikur, ndërkohë që sqaroheshit asokohe i kishit votat, por harxhonit kohën për të ndarë kush ishit ju apo Bylykbashi? Këtë gjë ta kishit bërë, kur kishit edhe bashkëkryetarin tjetër”, tha Qefalia.
