Ka nisur këtë të hënë dërgimi i dokumentacionit zgjedhor/fletës së votimit për zgjedhësit jashtë Shqipërisë.
Materialet e para që u dërguan ishin ato të qarqeve Dibër dhe Berat, ndërsa nga sot dhe në vijim çdo ditë në mëngjes posta do të dërgojë fletët e votimit jashtë vendit.
Pra, operatori i shërbimit postar do të dërgojë çdo ditë materialet zgjedhore të bëra gati nga administrata e KQZ-së.
120 persona po punojnë me tre turne në qendrën për votimin nga jashtë, në mënyrë që të bëhen gati zarfet me materialet zgjedhore që do t’u dërgohen votuesve të regjistruar në diasporë.
Fleta e votimit e qarkut nga ku vjen qytetari, pasi është vulosur dhe futur në një zarf të anonimizuar A, futet pastaj në një zarf më të madh B, i cili mban të dhënat e koduara të çdo zgjedhësi.
Më pas, kompania postare e merr zarfin B, e fut në zarfin e verdhë të postës, bashkë me një udhëzues, një listë me kontakte të kompanisë nëpër botë, si dhe një zarf tjetër postar për kthimin e votës.
Kompania postare bën mbylljen e zarfit me kodet e adresës, dhe pastaj i merr në dorëzim ato për t’i shpërndarë në 85 shtete të botës.
Aktualisht janë përgatitur rreth 10 mijë sete ndërsa vijon puna pa ndërprerje dhe praktikisht nga e marta e më pas emigrantët që kanë marrë dokumentacionin mund të votojnë pa pritur 11 majin.
Ata që janë refuzuar, apo nuk janë regjistruar në KQZ, vijojnë ta kenë emrin në listën e zgjedhësve në Shqipëri dhe mund të vijnë fizikisht për të ushtuar të drejtën e votës.
Në zgjedhjet e 11 majit janë regjistruar për të votuar 245 mijë e 953 shqiptarë nga jashtë vendit.
