Finalja e tensionuar e Ligës së Kombeve mes Portugalisë dhe Spanjës në Allianz Arena të Mynihut u eklipsua nga një tragjedi.
Pavarësisht përfundimit 2-2 pas kohës së rregullt dhe shtesës, Portugalia festoi pas fitores me penallti. Por fundi i pjesës së parë të shtesës solli një ngjarje të rëndë.
Një tifoz, identiteti i të cilit ende nuk është bërë publik, ra nga një prej tribunave më të larta të stadiumit dhe humbi jetën si pasojë e rënies.
UEFA konfirmoi lajmin përmes një deklarate zyrtare:“Në stadiumin e Mynihut ndodhi një situatë që kërkoi ndërhyrjen e shërbimeve të urgjencës. Përkundër përpjekjeve të mjekëve, tifozi fatkeqësisht ndërroi jetë në orën 00:06. Mendimet tona janë me familjen e tij në këtë kohë të vështirë.”
Trajneri i Spanjës, Luis de la Fuente, e hapi konferencën për shtyp me një mesazh ngushëllimi.
“Para së gjithash, dua të shpreh ngushëllimet e mia familjes së viktimës. Kjo tragjedi na kujton se jeta është shumë më e rëndësishme se çdo ndeshje”, deklaroi ai.Mediat spanjolle raportojnë se shërbimet e emergjencës u përpoqën menjëherë të ndihmonin të plagosurin dhe e mbuluan vendin e aksidentit për të shmangur pamjet e panevojshme. Ndonëse aksidenti u njoftua në tribunë, ndeshja vazhdoi.
