Shkup, 9 qershor – Ministria e Punëve të Brendshme (MPB) dhe Këshilli Republikan për Siguri në Komunikacionin Rrugor (KRSKRR) sot fillon fushatë e cila synon respektimin e rregullave të komunikacionit në rrugët e shpejta (ekspres). Janë promovuar dy video edukative, në gjuhën maqedone dhe në gjuhën shqipe.
“‘Rrugë ekspres’ është rrugë publike e ndërtuar në mënyrë të specializuar dhe e dedikuar ekskluzivisht për komunikacionin e mjeteve motorike e shënuar me shenjën e përcaktuar të komunikacionit, me të paktën nga një korsi për secilin drejtim dhe një korsi ndalimi, në të cilën komunikacioni mund të kyçet, përkatësisht të shkyçet vetëm në nyje të caktuara dhe të ndërtuara në mënyrë speciale dhe e cila është e mbrojtur nga qasja jashtë këtyre sipërfaqeve. Rruga ekspres ka nga një korsi komunikacioni në secilin drejtim, të cilat janë të ndara nga njëra-tjetra me një vijë të plotë ose të ndërprerë në varësi të konfigurimit të terrenit. Përveç korsisë së komunikacionit për lëvizjen e automjeteve, në rrugën ekspres ka edhe një korsi për ndalimin e automjeteve, e cila është e dedikuar ekskluzivisht për ndalimin e automjeteve. Në rrugën ekspres nuk është e lejuar lëvizja e këmbësorëve, biçikletave, traktorëve dhe automjeteve të tjera të ngadalshme”, thuhet në kumtesë.
Shpejtësia maksimale e lejuar është e kufizuar në 110 kilometra në orë, përveç nëse nuk përcaktohet ndryshe me shenjën e komunikacionit.
Tejkalimi lejohet vetëm kur ka dukshmëri të mirë dhe ka vijë të ndërprerë dhe vijë të shënuar në rrugë.
Çdo lëvizje me automjet në korsinë për ndalim përbën kundërvajtje komunikacioni dhe i nënshtrohet gjobës konform Ligjit. Në rrugën ekspres ndalohet kthimi gjysmërrethor, ndalimi dhe parkimi, përveç në vendet e caktuara.
Shoferët duhet të jenë të kujdesshëm, të mbajnë distancë të sigurt dhe t’i respektojnë të gjitha shenjat e komunikacionit. Rruga ekspres ofron shpejtësi – por, vetëm kur përdoret në mënyrë të duhur dhe të përgjegjshme.
Rruga ekspres nuk është autostradë dhe nuk ka korsi të veçantë për tejkalim.
Në rrugën ekspres, tejkalimi mund të bëhet vetëm kur lejohet, në mënyrë të sigurt – dhe ekskluzivisht në pjesët e rrugës ku është shënuar me vijë të ndërprerë dhe nëse nuk pengon automjetet që lëvizin nga drejtimi i kundërt.
Nëse afrohet një automjet që synon të tejkalojë një automjet tjetër, shoferi i automjetit që po tejkalohet nuk guxon të përdorë korsinë për ndalim që të “krijojë” hapësirë për t’u tejkaluar – kjo është një korsi ekskluzivisht për ndalim sipas nevojës, assesi për komunikacion.
“Tejkalimi në segmentet rrugore të padukshme, në kthesa, duke vozitur në korsinë e frenimit ose duke kaluar mbi vijën e plotë është rreptësishtë i ndaluar dhe paraqet një rrezik serioz. Manovrat e këtilla në komunikacion shpesh përfundojnë me aksident që mund të shkaktojë lëndime serioze… dhe humbje jete. Mos nxito – një tejkalim i paligjshëm mund të jetë vendimi yt i fundit. Në rrugën ekspres respekto rregullat që shpëtojnë jetë”, theksohet në kumtesë.
