Mesfushori sulmues Xavi Simons është bërë një nga objektivat më të kërkuar në këtë afat kalimtar, duke tërhequr vëmendjen e klubeve më të mëdha evropiane.
Sipas Sky Sports Germany, Chelsea ka aktivizuar zyrtarisht interesimin për ta transferuar talentin holandez nga RB Leipzig, duke nisur bisedimet për kushtet e marrëveshjes.
22-vjeçari shkëlqeu në sezonin e fundit në Bundesliga, ku realizoi 11 gola dhe dha 8 asistime në 33 ndeshje, duke u kthyer në një lojtar vendimtar për skuadrën gjermane.
Leipzig e bleu për rreth 50 milionë euro pas huazimit nga PSG, dhe tani kërkon përfitime të mëdha nga shitja e tij, ndërsa Chelsea po e sheh si “qershinë mbi tortë” të projektit të ri.
Klubi gjerman synon që nga shitja e tij të fitojë minimalisht 80 milionë euro.
Arsenali dhe Liverpooli raportohet se janë tërhequr nga gara, duke i lënë Chelseat një rrugë më të hapur drejt transferimit të mesfushorit.
Në horizont është edhe Bayern Munich, por interesi i tyre është më i zbehët, pasi prioritet mbetet transferimi i Luis Diaz nga Liverpool.
I rritur në akademinë La Masia të Barcelonës, Simons përfaqëson një kombinim të cilësisë teknike dhe maturisë taktike, dhe një profil ideal për vizionin e Chelseat në Ligën Premier dhe Evropë.
