Ish-prezantuesja e kanalit 7Bravo, e cila u zhvendos në kryeqytetin britanik më 18 qershor, ka ndarë me ndjekësit e saj në blogun personal se aktualisht është e papunë dhe po përpiqet të përshtatet me realitetin e ri.
“Zyrtarisht u shpërngula në Londër më 18 qershor. Në letër duket si një vendim krejt i çmendur dhe, për të qenë e sinqertë, më tremb. Ju lutem, dikush të më punësojë,” shkruan 26-vjeçarja, duke shtuar se e ka të vështirë të përballojë pasigurinë, veçanërisht pa një vend pune.
Lucia ka rrëfyer gjithashtu ngarkesën emocionale të largimit nga Australia, veçanërisht ndarjen nga i dashuri i saj, Henry, dhe motrat e vëllezërit më të vegjël.
“Lamtumira me Henry ishte jashtëzakonisht e dhimbshme (kam trauma nga përshëndetjet në aeroporte). Edhe më e vështirë ishte ndarja me familjen time, putha vëllezërit e motrat në mes të një lumi me lot,” shkruan ajo.
Lucia Hawley nisi punën si prezantuese në 7Bravo në vitin 2022, kur kanali filloi transmetimet në bashkëpunim me NBC Universal.
Pas dy vitesh në ekran, në dhjetor 2023, Channel Seven njoftoi largimin e saj për të “eksploruar mundësi të reja”. Ajo u zëvendësua nga Bella Varelis, ish-finaliste e The Bachelor Australia.
Lucia është vajza e Antonía Kidman, motrës së Nicole Kidman dhe e ish-bashkëshortit të saj, Angus. Ka studiuar Shkenca Humane në Universitetin e Sidneit dhe ka nisur karrierën e saj me një praktikë në Vogue Australia, e më pas ka punuar në një kompani produksioni. Ajo ka qenë pjesë e platformës për gratë 9Honey të Channel Nine, para se të kalonte në 7Bravo.
Në fund të shkrimit të saj, ajo reflekton për vendimin që mori: “Është një ndjenjë e çlirimit dhe emocionit – pak a shumë kështu është jeta. Besoj se ‘shtëpia’ është një ndjenjë… Të kesh një rrjet mbështetjeje të jep besim për të ecur përpara në këtë botë.”
