Shkup, 3 shtator – Në hapësirën politike shqiptare shpeshherë fjalët kanë qenë të mjaftueshme për të manipuluar perceptime por rrallë për të ndërtuar realitet të dukshëm. Këtë e dëshmoi edhe një herë kandidati i VLEN-it për komunën e Çairit, Izet Mexhiti, i cili me deklaratat e tij të fundit jo vetëm që sulmoi kundërshtarin politik, por njëkohësisht shpalosi të vërtetën e hidhur të 20 viteve të keqqeverisjes së BDI-së, shkruan Zhurnal.
Akuzë e drejtpërdrejtë me fakte dhe prova reale –
Fjalët e Mexhitit ishin të pamëshirshme ndaj BDI-së ai tha se shqiptarët janë përmendur si “faktor” vetëm kur kanë qenë viktima të dhunës, burgosjeve dhe proceseve të montuara. Ai përmendi rastet Monstra e Kumanova, për të treguar se për shumëkënd brenda BDI-së, shqiptarët ekzistojnë vetëm si shifër tragjedie, jo si qytetarë që duhen përfaqësuar me dinjitet dhe zhvillim.
Ky ishte një sulm i drejtpërdrejt posaçërisht ndaj kundërkandidatit Bujar Osmani, i cili sipas Mexhitit mishëron këtë mendësi të rrezikshme. Në thelb deklaratat e Mexhitit shkojnë përtej retorikës elektorale. Ai ngriti një krahasim të drejtpërdrejtë gjatë vetëm një viti të qeverisjes së VLEN-it, komunat shqiptare kanë përfituar projekte madhore për ujësjellës, kanalizim dhe infrastrukturë moderne.
Ndërsa gjatë dy dekadave të qeverisjes së BDI-së, shqiptarët kanë mbetur ende të diskutojnë për nevoja elementare ndërkohë që vendi është përmbytur nga skandale dhe pazare politike. Ky kontrast është arma kryesore e Mexhitit pasi VLEN përfaqëson shpresën e një zhvillimi të matshëm ndërsa BDI bart barrën e një trashëgimie të dështuar.
Politika e frikës kundër politikës së projekteve –
Në thelbin e këtij debati qëndron pyetja çfarë ka prodhuar BDI në 20 vite pushtet? Përgjigjja që ofron Mexhiti është e qartë frikë, dhunë dhe skandale. Përkundrazi, VLEN, edhe pse me kohë të shkurtër në qeverisje, synon të matet me standarde konkrete të qeverisjes.
Prandaj, kur Mexhiti akuzon se BDI është në panik, kjo nuk është thjesht një frazë e zgjedhur për të ndezur fushatën. Është një pasqyrim i faktit se partia që për vite e mbajti veten si e vetmja përfaqësuese e shqiptarëve sot është e zhveshur nga vizioni dhe ideja për të ardhmen.
Deklaratat e fundit të Mexhitit mund të lexohen si një akt i fortë politik por edhe si një editorial i thjeshtëzuar në gjuhën e qytetarëve shqiptarët nuk janë faktor për tragjedi por duhet të jenë faktor për zhvillim.
Kjo është linja ndarëse e fushatës në Çair përballja mes një të kaluare të mbështetur mbi frikë dhe një të ardhme që kërkon të ndërtohet mbi projekte konkrete. Dhe në këtë duel Mexhiti duket i bindur se qytetarët kanë kuptuar tashmë se kush u ka shërbyer me fjalë dhe kush po përpiqet t’u shërbejë me vepra. /Zhurnal.mk
