Shkup, 3 prill, argument.mk/ – Kryetari i Partisë Demokratike Sali Berisha deklaroi sot se pa ndëshkimin e korrupsionit nuk ka dhe nuk mund të ketë asnjë hap drejt Bashkimit Europian.
Gjatë një konference për shtyp, Berisha u shpreh se raporti i vlerësimit të standardeve dhe luftës kundër korrupsionit (IBAR) është shtyrë tre herë gjatë muajit mars.
Sipas tij, “po bëhet gjithnjë e më i madh numri i vendeve që kundërshtojnë në mënyrë të prerë të votojnë IBAR-in”.
“Votimi i këtij raporti është kusht që kapitujt e tjerë të mund të mbyllen dhe ky votim është i ndërmjetëm, nuk është përfundimtar për dy kapitujt, 23 dhe 24, kapitujt për shtetin ligjor dhe luftën kundër korrupsionit dhe të drejtat e njeriut”, u shpreh Berisha.
Në këtë drejtim, Berisha deklaroi se “përpjekjet për ta arkivuar dosjen Balluku, janë përpjekjet më kriminale që shkelmojnë interesat personale, shoqërore dhe kombëtare të çdo shqiptari”.
“Është goditja më e rëndë që i bëhet interesave të shqiptarëve në dy aspekte. Së pari, lufta kundër korrupsionit merr fund. Pa dënimin, pa heqjen e imunitetit të Lubi Ballukut, nuk ka dhe nuk mund të ketë luftë kundër korrupsionit. Pa ndëshkimin e korrupsionit nuk ka dhe nuk mund të ketë asnjë hap drejt BE”, shtoi Berisha.
Po ashtu Berisha theksoi se vendet të cilat kanë një skepticizëm të qartë në procesin e zgjerimit të BE-së, dëshmojnë mospajtim të plotë me nismën Rama-Vuçiç, për integrimin në BE.
