Shkup, 5 prill, argument.mk/ – Kryetari i Parlamentit Studentor pranë Universitetit të Evropës Juglindore (UEJL), Besjan Rexhepi, u ka bërë thirrje studentëve që të marrin pjesë në mënyrë të organizuar dhe dinjitoze në protestën e paralajmëruar për nesër në Shkup, në mbështetje të kërkesës për dhënien e provimit të jurisprudencës në gjuhën shqipe.
Në reagimin e tij publik, Rexhepi thekson se studentët kanë përgjegjësi të qëndrojnë pranë njëri-tjetrit dhe të përkrahin kolegët e drejtësisë në një kërkesë që ai e cilëson si të drejtë dhe legjitime. Sipas tij, çështja nuk i përket vetëm një grupi të caktuar studentësh, por prek të gjithë, pasi lidhet drejtpërdrejt me barazinë, drejtësinë dhe të ardhmen profesionale të të rinjve.
“Është momenti të tregojmë solidaritet dhe unitet, duke mbështetur një kauzë që është në thelb e drejtë”, thekson Rexhepi, duke shtuar se protesta do të jetë paqësore, e organizuar dhe me dinjitet, por njëkohësisht me peshë të konsiderueshme.
Ai nënvizon gjithashtu se kjo nismë është ekskluzivisht studentore dhe se nuk do të lejohet në asnjë formë politizimi apo devijimi i saj nga qëllimi fillestar.
Në fund, Rexhepi u bën thirrje të gjithë studentëve që të bëhen pjesë e protestës dhe të japin një mesazh të qartë për kërkesat e tyre.
“Zëri ynë ka rëndësi – le ta bëjmë të dëgjohet”, përfundon ai, duke ftuar studentët që të bashkohen në protestën e nesërme në Shkup.
