Tiranë, 01 korrik, Zhurnal.mk – Qendrat shëndetësore verore vijojnë pa ndërprerje ofrimin e shërbimeve mjekësore për pushuesit në të gjitha zonat turistike të vendit.
Ministria e Shëndetësisë dhe Mirëqenies Sociale përcolli sot, momente pune nga stafi mjekësor i qendrës shëndetësore verore në lagjen muzeale Kala në Berat.
Në këtë qendër, ofrohet shërbim dhe kujdes shëndetësor si për turistët, por edhe për banorët e zonës historike të Beratit, duke trajtuar urgjencat e lehta dhe duke garantuar ndihmë të shpejtë në çdo moment.
Një çift turistësh të huaj, shprehen se shërbimi në këtë qendër shëndetësore ka qenë i përsosur veçanërisht gjatë kësaj periudhe nxehtësie.
“Është vërtet i dobishëm dhe të gjithë ishin shumë të sjellshëm”, u shprehën ata.
Prania e shtuar e shërbimeve shëndetësore në zonat turistike ka kontribuar në ofrimin në kohë të ndihmës mjekësore për pushuesit, duke garantuar një sezon turistik më të sigurt dhe më të shëndetshëm.
Gjatë sezonit turistik veror janë në funksion të plotë 36 qendra shëndetësore në të gjithë vendin, nga veriu në jug.
Risi për këtë vit janë dy qendra të reja shëndetësore verore që do të funksionojnë 24/7: një e dedikuar turizmit fetar pranë Kishës së Shën Ndout në Laç dhe tjetra pranë llixhave të Elbasanit.
Gjithashtu, dy qendra të reja shëndetësore janë hapur pranë destinacioneve me interes kulturor, kalaja e Beratit dhe kalaja e Gjirokastrës.
