Kryeministri Edi Rama deklaroi sot se Shqipëria do të shfuqizojë ligjin për Investimet Strategjike, ndërsa ligji për Zonat e Mbrojtura nuk do të anulohet, por do të rishikohet për t’u harmonizuar plotësisht me standardet e Bashkimit Europian.
Gjatë konferencës për shtyp pas Konferencës së IX Ndërqeveritare Shqipëri–Bashkimi Europian, Rama tha se dëshironte të shmangte çdo keqinterpretim lidhur me dy proceset.
“Na duhet të shfuqizojmë ligjin për Investimet Strategjike, gjë për të cilën kemi rënë dakord, sepse ky ligj e ka përmbushur misionin e vet. Po punojmë ngushtësisht edhe me Komisionin Europian për hartimin e ligjit të ri,” deklaroi Kryeministri.
Ai theksoi se situata është e ndryshme për ligjin për Zonat e Mbrojtura.
“Për ligjin e Zonave të Mbrojtura nuk kemi asgjë për të shfuqizuar. Edhe pse ka pasur një rezolutë në Parlamentin Europian që e ka kërkuar këtë, ne do ta rishikojmë ligjin mbi bazën e standardeve europiane dhe do të ndryshojmë gjithçka që nuk është në përputhje me to”, u shpreh Rama.
Kryeministri sqaroi se termi “shfuqizim” nënkupton anulimin e plotë të ligjit dhe se kjo vlen vetëm për ligjin për Investimet Strategjike.
“Shfuqizimi nënkupton anulim dhe ligji për Investimet Strategjike do të shfuqizohet. Ndërkohë, ligji për Zonat e Mbrojtura, që është një nga ligjet më të mira që kemi, do të përshtatet derisa të arrijë 100% standardet europiane. Janë dy gjëra të ndryshme,” theksoi ai.
Sipas Ramës, ndryshimet synojnë harmonizimin e plotë të legjislacionit shqiptar me acquis të Bashkimit Europian në kuadër të procesit të negociatave për anëtarësim.
