Presidenti i Lazios, Claudio Lotito konfirmoi ardhjen e afërt të trajnerit të ri Igor Tudor, i cili vjen si pasues i Murizio Sarrit të larguar.
Në fillim të kësaj jave, Sarri befasoi të gjithë duke ofruar dorëheqje nga posti i trajnerit të Lazios pas rezultateve negative.
Drejtuesit e klubit kryeqytetas ia pranuan atë dhe e vendosen ndihmësin e tij, Giovanni Martusciello si trajner të përkohshëm.
Megjithatë, mediat në Itali kanë shkruar të gjitha njëzëri se Lazio ka arritur marrëveshje me kroatin Tudor për të marrë drejtimin e skuadrës, diçka që u konfirmua sot (e shtunë) edhe nga presidenti Lotito.
“Zgjedhjet bëhen në bazë të bindjeve tona, këto duhet të jenë funksionale për arritjen e objektivave. Në Tudor ne pamë një person që sigurisht është në gjendje të drejtojë skuadrën, duke pasur përvojën, karakterin dhe mundësinë për të qenë në gjendje të përdorë burimet në mënyrën më të mirë të mundshme”, ka thënë Lotito për Calciomercato.
Ndryshe, Martusciello do të qëndrojë për ndeshjen e sotme ndaj Frosinones dhe Tudor do ta marrë drejtimin e skuadrës nga nesër (e diel) ose fillimi i javës.
Më e rëndësishmja, është një kontratë 18-mujore që zgjat deri në qershor 2025, me një opsion për t’u zgjatur për një vit tjetër, pasi Tudor nuk ishte përgatitur të pranonte një marrëveshje afatshkurtër deri në fund të sezonit.
Ky është një rikthim në Serie A për Tudorin, i cili në deri tani ka drejtuar klube si Galatasaray, Udinese, Hajduk Split, Hellas Verona dhe së fundmi Marseille.
Tudor gjithashtu ishte ndihmës trajner i Andrea Pirlos te Juventusi në sezonin 2020/21.
