Shkup, 5 gusht – Kryeministri i Kosovës, Albin Kurti bëri të ditur se është diskutuar çështja e dy të arratisurit në rastin “Monstra”, por edhe për ish-ushtarin e UÇK-së që po mbahet në Maqedoninë e Veriut, përcjell TV21. Kurti tha se ministrat e Drejtësisë të të dyjave vendeve janë në kontakt të vazhdueshëm dhe tha se beson që këto raste do të përmbyllen sa më shpejtë të jetë e mundur
“Për të dyja këto çështje kemi diskutuar dhe ministrat tanë respektiv të Drejtësisë do të jenë në kontakt të drejtpërdrejtë dhe të vazhdueshëm. Gjithçka do të shkojë në funksion të vlerës së përgjithshme që bazohet në ligj dhe kushtetutë, në procedurat dhe rregullat institucionale të dy vendeve por gjithashtu edhe në kuadër të marrëdhënieve fqinjësore dhe evropiane që ne dëshirojmë t’i kultivojmë. Rasti i dy të arratisurve gjithashtu u ngrit në Republikën e Kosovës për çfarë tash lënda është tek Prokuroria Speciale e vendit tonë dhe gjithashtu edhe për atë që po mbahet në Maqedoni të Veriut, tashmë jo në burg por me kërkesë të Serbisë për ekstradim, edhe ky rast është diskutuar dhe besoj që do të përmbyllim sa më shpejt të jetë e mundur të dyja këto në mënyrë që edhe ligj të zbatohet por edhe marrëdhëniet tona të mira fqinjësore të ruhen e të mirëmbahen”, tha Kurti.
