Shkup, 12 dhjetor – Në vitin 2023, komunat dhe Qyteti i Shkupit kanë shpenzuar 67.269.053 denarë (1,1 milion euro) për shërbime avokatie, përderisa ministritë kanë paguar 62.428.934 denarë (1 milion euro), tregon hulumtimi për pagesat për shërbimet e avokaturës nga buxhetet e komunave dhe ministrive që publikoi sot Qendra për komunikime civile.
Sipas hulumtimit, komunat përdorin kritere të ndryshme për përzgjedhjen e avokatëve, duke përfshirë reputacionin, përvojën, qasjen dhe rekomandimet.
Hulumtimi, gjithashtu, tregon se 72 nga 81 komuna kanë angazhuar avokatë, ndërsa një e katërta e tyre paguajnë paushall mujor.
Nga komunat, Qyteti i Shkupit dhe Gazi Baba prijnë me shumat e paguara për avokatë, ndërsa tek ministritë ajo është Ministria e Financave (për funksione shtetërore), pastaj e Drejtësisë dhe ajo e Punës.
Më së shumti para i janë paguar avokatit Vllatko Ristovski, të cilit komuna e Gazi Babës i ka paguar mbi 6 milionë denarë gjatë vitit 2023.
Sipas hulumtimit, komunat dhe ministritë nuk kanë rregulla të brendshme të shkruara për angazhimin e avokatëve, ndërsa furnizimi i shërbimeve të avokatëve është i përjashtuar nga Ligji për furnizimet publike.
