Kryetari i Partisë Demokratike, Sali Berisha akuzoi sot mazhorancën se po bllokon vendimin e Gjykatës Kushtetuese dhe të Komisionit të Venecias për heqjen e mandatit të deputetes së Partisë Socialiste, Olta Xhaçka.
Gjatë fjalës së mbajtur në Kuvend, kryetari i Partisë Demokratike, Sali Berisha kërkoi nga mazhoranca respektimin e Kushtetutës.
Berisha tha se “nëse mazhoranca nuk respekton Kushtetutën, atëherë mosbindja civile do të mbërrijë edhe në Kuvend dhe në sallën e parlamentit”.
“Në historinë e Evropës dhe të botës kurrë nuk ka ndodhur që një ministre pasi burrin e vet investitor strategjik, në shkelje flagrante të ligjeve të vendit, pra pasi përvetësoi duke përdorur pushtetin e besuar nga qytetarët për të pasuruar vetën dhe familjen e vet me një pronë 10 mijë metra katrorë tokë publike në një zonë ku kushton të paktën 250 euro metri katror, tani ju poshtëroni Kushtetutën, poshtëroni vendin, poshtëroni zgjedhësit dhe mbani këtu në mënyrën më të paimagjinueshme njeriun e ndëshkuar nga Gjykata Kushtetuese dhe Komisioni i Venecias”, theksoi Berisha.
Kreu i PD-së u shpreh se “në qoftë se ju, pasi keni futur në xhep Skapin e partisë, pasi përpiqeni të injoroni tërësisht aktet e kontrollit të shtetit, bllokoni dhe vendimet e Gjykatës Kushtetuese, bllokoni edhe vendimet e Komisionit të Venecias”.
Më tej Berisha tha se “ne kërkojmë të respektoni Kushtetutën, përndryshe mosbindja civile do vijë edhe në sallë. Po, do vijë në sallë. Nuk mund të shkelmoni ju Kushtetutën sipas qejfit tuaj”.
“A mund të rrihet në parlament me një hajdute që ka marrë tokën publike si ministre?”, përfundoi Berisha.
