Një konflikt ka ndodhur të mërkurën rreth orës 11:30 në rrugën “Ahmet Kaqiku” në Ferizaj.
Viktima i mitur është sulmuar fizikisht nga dy persona të dyshuar.
Lajmin për Telegrafin e ka konfirmuar zëdhënësi i policisë për rajonin e Ferizajt, Kanun Veseli.
Ai bëri të ditur se ankuesi i mitur është sulmuar nga pronarët e kompanisë së autobusëve “Albana”, që operon në linjën Ferizaj-Mirosalë.
“Ankuesi i mitur M/SH/K, së bashku me prindin e tij, ka deklaruar se deri sa ishte duke udhëtuar me autobusin “Albana” linja Morosalë-Ferizaj, me të arritur në stacionin e autobusit në Ferizaj, konduktori i ka kërkuar që të shkoj pas tij në mënyrë që ai t’ia jap pagesën mujore për të cilën ankuesi kishte paguar. Ankuesi kishte shkuar pas tij në depon e stacionit te autobusëve, ku dy persona të dyshuar pronar i kompanisë “Albana” te dy M/SH/K, e kishin sulmuar fizikisht viktimën”, tha Veseli.
Pas veprimeve të hetimit, me urdhër të prokurorit, njëri nga dy të dyshuarit është ndaluar për 48 orë për hetime të mëtejshme lidhur me ngjarjen.
Policia e Kosovës ka njoftuar se po vazhdojnë hetimet për zbardhjen e plotë të rrethanave të sulmit dhe për identifikimin e masave ligjore që do të ndërmerren ndaj të dyshuarve.
