Shkup, 2 shkurt – Në mungesë të urës funksionale në Bit Pazar, të moshuarit detyrohen të kalojnë rrugën me frikë së mund të jetë kalimi i tyre i fundit. Vijat e bardha mungojnë, ndërsa veturat, shpesh kanë përplasur kalimtarët dhe kanë shkaktuar edhe aksidente me viktima në këtë vendkalim ilegal të Bit Pazarit në Shkup.
Edhe përkundër vështirësive për të kaluar këtë vendkalim, qytetarët detyrohen të përballen me rrezikun. Ura është e mbyllur ndërsa vendkalimi tjetër është rreth 300 metra më tej.
“Është e vështirë por çfarë të bëjmë, aty pleqtë nuk mund të hipin, të rinjtë po por ne pleqtë nuk mundemi, ne këtu e kemi më rrafsh. Është pak e rrezikshme apo? Po, është shumë e rrezikshme se të bien veturat. Ka shofer që lejen e ka marrë me para dhe ai nuk din të vozisë, si ta marrë veturën ai s’di çfarë bën, si t’i dalësh përpara të shkel dhe shkon si qeni në rrush”, u shpreh një qytetar.
Mbikalimet në Shkup thuajse të gjitha janë të pa frekuentuara nga qytetaret, në disa mungojnë liftet për personat e moshuar dhe me aftësi ndryshe, disa nuk mirëmbahen, disa janë të mbyllura ndërsa shumë ura tjera përdoren vetëm për reklamim.
“Këtë urën këtu e kanë vendosur vetëm për reklamim, e jo të kalojnë njerëzit, për reklama dhe nevojtore për kazanxhinjtë, ajo nuk është urë që të kalohet por duhet nën tokë për pleqtë të jetë rrafsh e jo neper shkallë si të shkosh”, tha një tjetër qytetar.
“Duhet që ta vendosin në funksion sepse kështu është investim i gabuar, i vendosur por jo funksional siç është edhe në Vllae dhe Gjorçe Petrov apo këtu tek Jahja Pasha, duhet të jenë efektiv dhe duhet që kryetarët e komunave t’i implementojnë dhe të funksionojnë për qytetarët”, deklaroi një qytetar tjetër.
Deri tani, Institucionet vazhdojnë të mbeten pa një plan konkret për urat mbikaluese jo funksionale.
“Ura më poshtme afër Bit Pazarit e cila nuk shfrytëzohej shkaku që ishte e mbyllur, detyron qytetarët që të kalojnë edhe pse ka rrezik të madh, ndërsa kjo urë më lartë edhe pse është e hapur përsëri nuk mirëmbahet dhe siç mund të shihet nga jashtë, shfrytëzohet më së shumti vetëm për reklamim ndërsa janë të paktë qytetarët të cilët e shfrytëzojnë këtë urë”, raporton Avni Tahiri – Gazetar.
