Elon Musk, miliarderi të cilit i është besuar detyra për të ulur shpenzimet e qeverisë së SHBA-së, u shfaq në skenën e një konference konservatore pranë Uashingtonit të enjten me një dhuratë nga presidenti argjentinas, Javier Milei: një sharrë motorike.
“Kjo është një sharrë motorike për burokracinë”, tha Musk, duke ngritur në ajër mjetin e ndritshëm gjatë Konferencës së Veprimit Politik Konservator në Maryland.
Sharra metalike e kuqe, të cilën Milei ia kishte dhuruar miliarderit, kishte të gdhendur sloganin e tij të njohur në spanjisht: “¡Viva la libertad, carajo!”, që në përkthim do të thotë “Rroftë liria, dreqi ta hajë!”
Musk po udhëheq shkurtime të mëdha në kuadër të administratës së presidentit amerikan, Donald Trump, të cilat kanë reduktuar ndjeshëm fondet për agjencitë rregullatore të bankave, punonjësit e pyjeve, shkencëtarët e raketave dhe dhjetëra mijëra punonjës të tjerë shtetërorë.
Të enjten, 6000 punonjës të Administratës Tatimore të SHBA-së u njoftuan se do të pushoheshin nga puna, sipas një burimi të njohur me këtë çështje.
Musk, drejtori i kompanisë së automjeteve elektrike Tesla dhe njeriu më i pasur në botë, ka promovuar me entuziazëm fjalimet e Mileit.
Përpara se Milei të bëhej president i Argjentinës në fund të vitit 2023, ai shpesh mbante një sharrë motorike në tubimet elektorale si simbol të synimit për të ulur shpenzimet qeveritare.
