Shkup, 4 mars – Maqedonia e Veriut mund të llogarisë në mbështetjen e Hungarisë në rrugën e saj të integrimit evropian. Procesi i anëtarësimit të Maqedonisë së Veriut në Bashkimin Evropian zgjat shumë dhe nuk është përgjegjësi e Maqedonisë së Veriut, por e anëtarëve të Bashkimit Evropian, deklaroi pasdite kryeministri hungarez Viktor Orban nga Budapesti në konferencën e përbashkët për shtyp me kryeministrin maqedonas Hristijan Mickoski, njoftoi raportuesi i MIA-s.
“Jo vetëm që është e turpshme që ky proces po ecën kaq ngadalë, por nuk është përgjegjësi e Maqedonisë së Veriut për këtë, por ne anëtarët e Bashkimit Evropian. Kjo është arsyeja pse ne e mbështesim anëtarësimin e Maqedonisë së Veriut. Bashkimi Evropian duhet të përmirësojë konkurrencën dhe unë nuk shoh zgjidhje tjetër për përmirësimin e konkurrencës përveç zgjerimit. Deri më tani, çdo zgjerim i Bashkimit Evropian ka sjellë vetëm të mira”, tha Orban.
Lidhur me marrëdhëniet dypalëshe, Orban tha se shkëmbimi tregtar është vazhdimisht në rritje dhe është shtatëfishuar që nga viti 2010. “Maqedonia e Veriut dhe Hungaria, së bashku me Serbinë, i përkasin të njëjtit rajon ekonomik. Sipas mendimit tonë, kjo hapësirë mund të jetë një zonë e përbashkët ekonomike ku bashkëpunimi mund të sjellë një potencial të madh ekonomik. Problemi është se ne jemi në Bashkimin Evropian dhe këto dy vende janë jashtë Unionit. Çfarë mund të bëjmë? Mund të ndërtojmë marrëdhënie më intensive dypalësh”, tha Orban.
Ai bëri të ditur se po përgatitet edhe nënshkrimi i marrëveshjes ekonomike ndërqeveritare.
Lidhur me luftën në Ukrainë, Orban tha se Hungaria mbetet e mendimit se lufta duhet të përfundojë dhe se i mirëpresin negociatat midis SHBA-së dhe Rusisë.
“Ka tre vjet që jetojmë në hijen e luftës. I mirëpresim negociatat midis SHBA-së dhe Rusisë dhe jemi të interesuar për një rezultat të suksesshëm. Ne qëndrojmë kundër atyre vendeve të Bashkimit Evropian, të cilët janë miqtë dhe aleatët tanë, por që kanë vendosur që lufta në Ukrainë duhet të vazhdojë. Vazhdimi i luftës është i keq dhe i gabuar. Do të flasim të enjten për këtë në Bruksel”, tha Orban.
Dy kryeministrat diskutuan gjithashtu edhe për migracionin dhe kryeministri hungarez përshëndeti përpjekjet e Maqedonisë së Veriut për të ruajtur kufirin.
