Kryetari i Aleancës për Ardhmërinë e Kosovës, Ramush Haradinaj ka përkujtuar sot Masakrën e Izbicës, ku forcat serbe ekzekutuan mizorisht 147 shqiptarë të paarmatosur.
Haradinaj në një postim në Facebook shkruan se masakra e Izbicës tronditi ndërgjegjen e botës.
“Masakra e Izbicës tronditi ndërgjegjen e botës, por na dha forcën për t’u ngritur mbi dhimbjen, që rrugën tonë drejt lirisë ta jetësojmë me amanetin e të rënëve. 147 shqiptarë të paarmatosur; gra, pleq e fëmijë – përfshirë Dafinën e cila ishte vetëm gjashtë muajshe, u ekzekutuan mizorisht si pjesë e planit për zhdukjen e qenies tonë.
Në këtë të njëjtën ditë, kur Kosova digjej në të katër anët, bashkëluftëtarët e mi të Zonës Operative të Dukagjinit i shkaktuan një disfatë të rëndë armikut në Betejën e Pozharit. Kjo betejë u shënua me emrat e heronjve të saj, Elez Geci e Maxhun Berisha”, shkruan Haradinaj.
Lideri i AAK-së thekson se këtë ditë e kujton edhe për faktin se është dita kur themeluam Brigadën 137 Gjakova, brigada e parë urbane në Kosovë, përbërë nga bijtë e bijat më të mira të Atdheut, cilët me përkushtimin dhe guximin e tyre, dëshmuan se liria nuk ishte thjesht një aspiratë, por një e drejtë për të cilën luftohej deri në vetëmohim.
“Kosova i ka të gdhendur emrat dhe veprën e të gjithë të rënëve në kujtesën e saj përgjithmonë. Ata janë themeli i lirisë sonë dhe frymëzim i përjetshëm për brezat që vijnë”, shprehet Haradinaj.
