Ndeshja e rregullt e kampionatit të basketbollit mes KK Kumanovës dhe BC Çair 2030 u mbyll në një atmosferë të rënduar, pasi tifozët vendas shkaktuan një incident të rëndë me thirrje nacionaliste dhe më pas sulmuan autobusin e ekipit mysafir, njofton Telegrafi.
Që në pjesën e parë të ndeshjes, tifozët e Kumanovës filluan të brohorisnin parulla fyese dhe raciste, duke thirrur “Shqiptar i mirë, shqiptar i vdekur!”. Për shkak të këtyre skandaleve, zyrtarët e ndeshjes vendosën të zbrazin tribunat dhe t’i largojnë tifozët nga salla.
Megjithatë, incidentet nuk përfunduan aty. Pas ndeshjes, autobusi i ekipit BC Çair 2030 u sulmua nga persona të papërgjegjshëm, të cilët shkruan mbi të të njëjtat parulla që ishin brohoritur në sallë.
Sa i përket rezultatit të ndeshjes, KK Kumanova arriti të triumfojë me shifrat 97:74. Pjesa e parë përfundoi me epërsinë 26:21 për vendasit, ndërsa në çerekun e dytë e zgjeruan avantazhin në 31:22. Në pjesën e dytë, diferenca u rrit edhe më shumë, duke i siguruar Kumanovës një fitore të qetë në parket, por të errësuar nga incidentet e shëmtuara jashtë tij.
